തോന്ന്യാസത്താളുകള്‍

ചൂടുള്ള രാത്രികള്‍

2010-04-13T21:58:00.000+05:30

ബ്രിട്ടനിലെ Holiday Inn Hotel group കഴിഞ്ഞ തണുപ്പുകാലത്ത് ഒരു ഓഫര്‍ ഇറക്കുകയുണ്ടായി. തണുപ്പ് മൂലം ഉറങ്ങാന്‍ കഷ്ടപ്പെടുന്ന അതിഥികള്‍ക്ക് വേണ്ടിയായിരുന്നു ഈ സേവനം. ഹോട്ടല്‍ ജീവനക്കാരില്‍ ചിലര്‍ 5 മിനുട്ടോളം ബെഡില്‍ കിടന്ന് ചൂട് പകര്‍ന്നതിന് ശേഷം അതിഥിയ്ക്ക് സുഖമായി ഉറങ്ങാം.

കവബത്തയുടെ(Nemureru Bijo) House of the sleeping beauties എന്ന നോവല്‍ വിലാസിനി ‘സഹശയനം’ എന്ന പേരില്‍ തര്‍ജ്ജമ ചെയ്തിട്ടുണ്ട്. അതാണ് മനസ്സില്‍ ആദ്യം കയറിവന്നത്. ഒരു ജര്‍മ്മന്‍ സിനിമയുമുണ്ടെന്ന് തോന്നുന്നു ഇതിനെ ആസ്പദമാക്കി. വായിക്കേണ്ട പുസ്തകം.

മനുഷ്യരെ ഒഴിവാക്കി കഴിവതും സേവനങ്ങള്‍ യന്ത്രങ്ങള്‍ ചെയ്ത് തുടങ്ങിയപ്പോഴാണ് ഇങ്ങിനെയൊരു വിദ്യ. Electric blanket, hot water bottles, Warm bed എന്നീ വിദ്യകളൊക്കെ നിലനില്‍ക്കുമ്പോഴാണ് ഇങ്ങിനെയൊരു തന്ത്രവുമായി ഈ ഹോട്ടല്‍ ഗ്രൂപ്പ് ഇറങ്ങിയത്. അതിനുശേഷം അവിടെ ആളുകള്‍ ഇടിച്ചുകയറിയോ എന്നറിയില്ല.

ഇതൊരു പഴയ വാര്‍ത്തയായതുകൊണ്ട് കൂടുതലൊന്നും പറയാനില്ല.ഇപ്പോള്‍ തണുപ്പ് മാറി നല്ല ചൂട് തുടങ്ങിയിരിയ്ക്കുന്നു.

ഒരു പക്ഷെ, വെറുമൊരു പബ്ലിസിറ്റി സ്റ്റണ്ട് ആയിരുന്നിരിയ്ക്കണം.
(വാര്‍ത്ത ഇവിടെ)

റോഡില്‍ത്തുപ്പിയാല്‍..

2010-03-25T19:04:00.002+05:30

നമ്മുടെ നാട്ടിലല്ല, സ്ഥലം ഇംഗ്ലണ്ടിലാണ്, Wembley എന്ന സ്ഥലത്ത് പാന്‍ കഴിച്ച് റോഡില്‍ത്തുപ്പുന്നത് ശിക്ഷാര്‍ഹം. ഏകദേശം 20000 പൌണ്ട് ചിലവ് വരുന്നത്രെ വര്‍ഷം തോറും അത് മുഴുവന്‍ കഴുകി വൃത്തിയാക്കാന്‍. എന്തായാലും ഇതിനുത്തരവാദികള്‍ ആരെന്ന് സംശയമൊന്നും വേണ്ട.

ചുവന്ന തുപ്പല്‍ കണ്ട് അത് രക്തമാണെന്ന് തെറ്റിദ്ധരിച്ച് അവിടെ വളരെയധികം ക്രിമിനല്‍ ആക്റ്റിവിറ്റി നടക്കുന്നുവെന്ന് തെറ്റിദ്ധാരണയുണ്ടാകാന്‍ സാധ്യതയുണ്ടെന്നും അതുവഴി ടൂറിസത്തിനെ ബാധിയ്ക്കുമെന്നുമെല്ലാം കൂട്ടിവായന.

ചുയിങ്ങ്ഗം റോഡില്‍ തുപ്പുന്നതും ശിക്ഷാര്‍ഹമാണ്.

വാല്‍: ഈ കൌണ്‍സിലേഴ്സിനെയെല്ലാം നമ്മുടെ നാട്ടില്‍കൊണ്ടുവന്ന് ഒരു ട്രെയിനിങ്ങ് കൊടുക്കണം. പാന്‍ കഴിച്ച് നല്ല ചുമരൊക്കെ തുപ്പി വെടക്കാക്കിയില്ലെങ്കില്‍ പിന്നെന്തു രസം? ഏത്?

വാര്‍ത്ത ഇവിടെ

ഇന്ത്യക്കാരനെ മതി

2010-03-20T14:07:00.002+05:30

Wanted - Preferably Indians എന്ന പരസ്യം കൊടുത്ത ഐ.ടി കമ്പനി പുലിവാലു പിടിയ്ക്കുന്നു.

'Minimum six years of experience in IT . . . The person should be a UK citizen with security clearance from the UK Government. Preferably of Indian origin.'

ഇംഗ്ലണ്ടിലെ മനുഷ്യാവകാശ കമ്മീഷന്‍ ഇതിനെതിരെ അന്വേഷണാം നടത്തുന്നു.

ആദ്യം വായിച്ചപ്പോള്‍ ചിരിയ്ക്കാനാണ് തോന്നിയത്. ഇന്ത്യന്‍ പാരമ്പര്യമുള്ളവര്‍ക്കാണ് മുന്‍‌ഗണനയെന്ന് ഒരു ബ്രിട്ടീഷ് ഐ.ടി കമ്പനി പരസ്യം ചെയ്തിരിയ്ക്കുന്നു. ഒരു ഭാരതീയന് അഭിമാനിയ്ക്കാന്‍ ഇതില്പരം എന്തു വേണം? ആഗോളതലത്തില്‍ തന്നെ അറിയപ്പെട്ടു കഴിഞ്ഞ ഭാരതീയന്റെ ഐ.ടി കഴിവുകള്‍ക്ക് ഒരു പൊന്‍‌തൂവല്‍ കൂടിയെന്നേ ആദ്യം കരുതിയുള്ളൂ.

പിന്നെയാണ് പരസ്യത്തിലെ യു.കെ ഗവര്‍മ്മെന്റിന്റെ സെക്യൂരിറ്റി ചെക്കുകള്‍ കൈവശമുള്ള ആളായിരിയ്ക്കണം എന്ന ഭാഗം ശ്രദ്ധിച്ചത്. അതെ, അതുതന്നെ. റാണമാരെയും ഹെഡ്ലിമാരെയും ഇനി കൂടുതല്‍ വച്ചുപൊറുപ്പിയ്ക്കില്ലെന്ന് തന്നെയാണ് ആ ഭാഗം ഉദ്ദേശിയ്ക്കുന്നത്. ഇത്രയും നാള്‍ പത്രങ്ങളില്‍ ഇന്ത്യനെന്നോ പാക്കിസ്ഥാനിയെന്നോ ഒരു വേറ്തിരിവ് കണ്ടിരുന്നില്ല, പകരം South Asian എന്ന ഒരു പൊതുനാമത്തില്‍, Indian, Pakistani,Srilankan,Bangladesi കളെ എല്ലാവരെയും ഉള്‍ക്കൊള്ളിയ്ക്കുകയായിരുന്നു പതിവ്. കഴിഞ്ഞ വര്‍ഷം പാക്കിസ്ഥാനികള്‍ നടത്തിയ കല്യാണത്തട്ടിപ്പുകള്‍ക്ക് ശേഷം വളരെ വ്യക്തമായിത്തന്നെ പാക്കിസ്ഥാനികള്‍ എന്ന് പത്രങ്ങള്‍ തുറന്നെഴുതാന്‍ ധൈര്യം കാണിയ്ക്കുന്നു.

പരസ്യം ചെയ്ത കമ്പനി ഇത് അപ്പാടെ നിഷേധിച്ചിട്ടുണ്ട്. ഇങ്ങിനെയാണ് പരസ്യം വന്നത് എന്ന് അറിഞ്ഞ്ഞിട്ടില്ലെന്നും ഈ പരസ്യം ജനങ്ങള്‍ക്കിടയില്‍ വേര്‍തിരിവുകള്‍ സൃഷ്ടിയ്ക്കുമെന്നും അവര്‍ മനസ്സിലാക്കുന്നു. ആ പരസ്യം പിന്‍‌വലിയ്ക്കപ്പെട്ടൂ കഴിഞ്ഞു.

ഈ കമ്പനിയ്ക്ക് ഇഗ്ലണ്ടിലും ബംഗലുരുവിലും ഓഫീസുകളുണ്ട്. രാജ്യങ്ങള്‍ക്കിടയിലെ യാത്രാ,സുരക്ഷാ ക്രമീകരണങ്ങളും, വിസ,പാസ്പോര്‍ട്ട് കാലതാമസങ്ങള്‍ കുറയ്ക്കാന്‍ മാത്രമായ്യിരിയ്ക്കാം ഈ വാക്കുകള്‍ കൊണ്ട് അവര്‍ ഉദ്ദേശിച്ചത്.
പലതവണ സ്വദേശീയരായ സുഹൃത്തുക്കള്‍ക്കൊപ്പം യുറോപ്യന്‍ യൂണിയനില്‍ യാത്ര ചെയ്യുമ്പോള്‍ അവര്‍ക്കെല്ലാം ഈസി ക്ലിയറന്‍സും കഴിഞ്ഞ് എനിയ്ക്ക് വേണ്ടി 20-40 മിനിട്ട് കാത്ത് നില്‍ക്കേണ്ടി വരുന്നത് പലപ്പോഴും മനോവിഷമമുണ്ടാക്കിയിട്ടുണ്ട്. ഇത്തരം തടസ്സങ്ങള്‍ മാറ്റിക്കിട്ടാനായിരിയ്ക്കണം, അല്ലെങ്കില്‍ പാക്കിസ്ഥാനി പിതാമഹന്മാരുള്ള യു.കെ പൌരന്മാര്‍ക്ക് ഇന്ത്യ വിസ നല്‍കാനുള്ള സാധ്യത തുലോം കുറവായതുകൊണ്ടായിരിയ്ക്കാം.

എന്തായാലും നല്ല പുകില്. മനുഷ്യാവകാശങ്ങള്‍ സംരക്ഷിയ്ക്കപ്പെടട്ടെ.
my name is Khan, and I am not a terrorist.

പ്രിയ മനോരമ സ്വ.ലേ

2009-11-12T03:10:00.004+05:30

പത്രം വായിച്ച് ഓരൊരുത്തരുടെ നെഞ്ചത്ത് കേറുക എന്നത് ത്രിശ്ശൂക്കാരന്റെ ഒരു ഹോബിയാണെന്ന് വായനക്കാര്‍ തെറ്റിദ്ധരിയ്ക്കരുത്.

വായിയ്ക്കുമ്പോള്‍ തോന്നുന്നത് അപ്പപ്പോള്‍ എഴുതിവിടുകയാണ് എന്ന് മാത്രം. ഇത് പറയാതെ പോകാന്‍ പറ്റില്ല, അത്രയ്ക്കും വലിയ അബദ്ധപഞ്ചാംഗമാണ് മനോരമയുടെ സ്വ.ലേ ഇന്നത്തെ പത്രത്തിന്റെ (ഓണ്‍ലൈന്‍ എഡിഷന്‍) മുന്നില്‍കൊണ്ട് നിരത്തിയിരിയ്ക്കുന്നത്.

ഇതാ ഇവിടെ

പറഞ്ഞിയിയ്ക്കുന്നത് ജ്യോതിഷത്തില്‍ ആര്‍ത്തവവും ലൈംഗികതയും തമ്മിലുള്ള ബന്ധമാണ്.

പതിനാറ് ദിവസങ്ങള്‍ക്കുള്ളിലുണ്ടാകുന്ന ലൈംഗികബന്ധത്തില്‍ നിന്ന് മാത്രമേ കുട്ടികള്‍ ഉണ്ടാകൂ എന്ന് ആധുനികശാസ്ത്രവും സമ്മതിയ്ക്കുന്നു എന്നാണ് കണ്ടുപിടുത്തം.

ചില സത്യങ്ങള്‍:

1.1995 ല്‍ 221 സ്ത്രീകളില്‍ നടത്തിയ ഒരു പഠനത്തില്‍ ഓവുലേഷന് മുന്‍പും ഓവിലേഷനുമടക്കമുള്ള 6 ദിവസങ്ങളിലാണ് ഗര്‍ഭധാരണത്തിനുള്ള സാധ്യതയെന്ന് കണ്ടെത്തി. ഓവുലേഷന്‍ നടക്കുന്ന ദിവസവും അതിനുമുന്‍പുള്ള ദിവസവും 33% സാധ്യതയും 5 ദിവസം മുന്‍പ് 10% സാധ്യതയുമാണ് ഉള്ളത്. ഓവുലേഷന്‍ കഴിഞ്ഞ ശേഷം ഗര്‍ഭധാരണത്തിന് സാധ്യത കുറവാണെന്ന് കൂടി ഈ പഠനം വെളിപ്പെടുത്തുന്നു. The new England Medical Journal ന്റെ December 07 1995 ലക്കത്തിലാണ് ഈ പഠനമുള്ളത്.

2.Ovulation കണ്ടുപിടിയ്ക്കുക എന്ന ശ്രമകരമായ ജോലിയാണ്. 1938 ല്‍ നടത്തിയ ചില പഠനങ്ങള്‍ (കുരങ്ങ്ന്മാരില്‍) menstruation തുടങ്ങി 9-20 ദിവസങ്ങള്‍ക്കുള്ളില്‍ ovulation സംഭവിയ്ക്കാമെന്നത് കണ്ടെത്തി.

ആര്‍ത്തവചക്രങ്ങള്‍ ഒരു മരീചിക പോലെയുള്ളവരുടെ കാര്യങ്ങള്‍ ലേഖകന്‍ മറന്നുപോയെന്ന് തോന്നുന്നു. Menstruation കഴിഞ്ഞുള്ള 16 ദിവസങ്ങള്‍ ഗര്‍ഭധാരണത്തിന് ഉത്തമമെന്നത് 14 ആം ദിവസം ovulation നടക്കുന്നു എന്ന തിയറിയുടെ അടിസ്ഥാനത്തിലാണ്.

പതിനാറ് ദിവസമെന്ന് ഒരു ആധുനികശാസ്ത്രവും പറയുന്നില്ല. ഓവുലേഷനു മുന്‍പുള്ള 6 ദിവസങ്ങള്‍ എന്ന് മാത്രമേ പഠനങ്ങള്‍ തെളിയിക്കുന്നുള്ളൂ.

മറ്റൊന്ന് കൂടി:- 2000 ല്‍ British Medical Journal ല്‍ പ്രസിദ്ധീകരിച്ച ഒരു പഠനത്തില്‍ Allen J Wilcox പറയുന്നത് സ്ത്രീകളില്‍ 'fertile window' അല്ലെങ്കില്‍ ഗര്‍ഭധാരണത്തിന് സാധ്യതയുള്ള ദിവസങ്ങള്‍ 6ആം ദിവസം മുതല്‍ 21ആം ദിവസം വരെ നീണ്ടുനില്‍ക്കാമെന്നാണ്.

സാധാരണ ഡോക്ടര്‍മാറ് പറയുന്ന menstruation ശേഷമുള്ള 10-17 ദിവസങ്ങളെ കാറ്റില്‍ പറത്തുകയാണ് ഈ പഠനം.പങ്കെടുത്തവരില്‍ 30% മാത്രമാണ് ഈ ദിവസങ്ങളില്‍ Ovulation ഉണ്ടായത്. അതു മാത്രമല്ല, ആര്‍ത്തവം കഴിഞ്ഞതിന് ശേഷമുള്ള 5 ദിവസങ്ങള്‍ safe period ആണെന്ന സങ്കല്‍പ്പവും കാറ്റില്‍ പറക്കുകയാണ്.

അപ്പൊ ചുരുക്കി പറഞ്ഞാല്‍ നമ്മുടെ ജ്യോതിഷികള്‍ ഇതൊക്കെ നേരത്തെ കണ്ടുപിടിച്ചെന്ന്. ഭാരതീയര്‍ക്ക് അഭിമാനിയ്ക്കാന്‍ ഒന്നുകൂടി. ഇനി ആ ദിവസങ്ങളില്‍ ഉണ്ടാകുന്ന കുട്ടികളുടെ സ്വഭാവ വിശേഷങ്ങള്‍ കൂടി ഒന്ന് prove ചെയ്ത് കിട്ടിയാല്‍ മതി.

വലിയ ഭൂരിപക്ഷം പത്രം വായനക്കാരും പത്രത്തില്‍ അച്ചടിച്ച് വരുന്നത് ശരിയാണെന്ന ധാരണക്കാരാണ്, പലപ്പോഴും ആരോഗ്യവും ലൈംഗികതയും വിഷയങ്ങളാവുമ്പോള്‍. യുവജനങ്ങളെ ലൈംഗിക, ആരോഗ്യ പംക്തികളിലൂടെ അവബോധരാക്കാനുള്ള ശ്രമം ഞാന്‍ തീരെ അവഗണിയ്ക്കുന്നില്ല. എങ്കിലും ജ്യോതിഷവും ശാസ്ത്രവും കൂട്ടിക്കുഴയ്ക്കുമ്പോള്‍ അവയില്‍ തെറ്റുകൂടാതെ നോക്കാന്‍ ശ്രമിയ്ക്കേണ്ടതാണ്.

ഉത്തരവാദിത്തമുള്ള ഒരു ഡോക്ടറും ഗര്‍ഭധാരണത്തിന് ഇത്തരം ഉപദേശങ്ങള്‍ കൊടുക്കില്ല. പകരം ശരിയായ ഓവുലേഷന്‍ എന്നാണ് എന്ന് കണ്ടുപിടിയ്ക്കാനുള്ള മാര്‍ഗ്ഗങ്ങള്‍ പറയുകയേ ഉള്ളൂ. അള്‍ട്രസൌണ്ട് സ്കാനിങ്ങ് അതില്‍ ഒന്ന് മാത്രം.

പക്ഷേ, ഇതു മൂലം പെട്ട് പോവുക safety period (for non reproductive sex) എന്ന സങ്കല്‍പ്പക്കാരാണ്. മനോരമയുടെ സ്വ്.ലേ യുടെ ശാസ്ത്രത്തിന്റെ അഭിപ്രായത്തില്‍ 16 ദിവസം കഴിഞ്ഞാല്‍ safe period ആണ്. പക്ഷെ പൊതു വിശ്വാസം ആദ്യത്തെ 9 ദിവസങ്ങളും 21 ദിവസങ്ങള്‍ കഴിഞ്ഞുള്ള ദിവസങ്ങളും safe period ആണെന്നാണ്. ഇത് രണ്ടും ചില സ്ത്രീകളില്‍ ശരിയായിരിയ്ക്കാം. എന്നാല്‍ വലിയ ഒരു ഭൂരിഭാഗത്തിനും ovulation swinging ആയതുകൊണ്ട് ഇത് unpredictable ആണ്.
സത്യകൃസ്ത്യാനികള്‍ക്ക് ഇത് ബാധമല്ലാത്തത് കൊണ്ട് ഇത് മനസ്സിലായില്ലെങ്കിലും വിഷമിയ്ക്കേണ്ട കാര്യമില്ല.

പിന്നെ സ്വ.ലേ പറഞ്ഞത് ആര്‍ത്തവസമയത്തുള്ള ലൈംഗികബന്ധം പാടില്ല എന്ന ആധുനികശാസ്ത്രം പറയുന്നു എന്നതാണ്. പല പ്രദേശങ്ങളിലും സംസ്കൃതികളിലും ആര്‍ത്തവരക്തത്തെ വളരെ മോശമായ ഒന്നായാണ് കാണുന്നത്. ആ വിശ്വാസങ്ങളില്‍ നിന്നായിരിയ്ക്കണം ആധുനികശാസ്ത്രത്തെ കൂട്ട് പിടിച്ചത്.

എന്നാല്‍ ആര്‍ത്തവരക്തം സാധാരണ രക്തത്തില്‍ കവിഞ്ഞ് മറ്റൊന്നല്ലെന്ന് മനസ്സിലാക്കിയാല്‍ ആ പ്രശ്നവും തീര്‍ന്നു. പക്ഷെ, അതെല്ലാം വ്യക്തികളെ ആസ്പദമാക്കി മാത്രമെ നിര്‍വചിയ്ക്കാന്‍ കഴിയൂ. ആധിനിക ശാസ്ത്രം ഈ വിഷയത്തില്‍ ഒരു hygiene alert മാത്രമേ നല്‍കിയിരിയ്ക്കാന്‍ സാധ്യതയുള്ളൂ. അതായത് താല്‍പ്പര്യക്കാര്‍ക്കാവാം, വേണ്ട മുന്‍‌കരുതല്‍ എടുക്കണമെന്ന് മാത്രം എന്ന്.

ഇനി മനോരമയില്‍ തന്നെ ഒന്ന് സെര്‍ച്ച് ചെയ്തപ്പൊല്‍ കിട്ടിയത്:-

മാസമുറക്കിടെ ലൈംഗികബന്ധമെന്ന വിഷയത്തില്‍ സി.നാരായണറെഡ്ഡി എന്ന സെക്സോളജിസ്റ്റ് പറയുന്നത്.

ഇതാ ഇവിടെ

ജ്യോതിഷം മാത്രം കൈകാര്യം ചെയ്യുന്നവര്‍ അതുമാത്രം ചെയ്താല്‍ പോരെ? ആരോഗ്യവും ലൈംഗികതയും ശാസ്റ്റ്രവും അറിയാവുന്നവര്‍ക്ക് വിടുന്നതല്ലേ നല്ലത്?

പ്രിയപ്പെട്ട സ്വ.ലേ, ഇനിയും ഇതുപോലുള്ള പറട്ട സാധനങ്ങള്‍ എഴുതി ദയവു ചെയ്ത് എന്റെ ഉറക്കം കളയരുത്. TYPING ഇപ്പോഴും ഞാനത്ര പോരാ...

വായന:

1. Birth Control: Contraception and the so called safe-period, British Med.Journal; James Young
1936 may 30

2.Timing of sexual intercourse in relation to ovulation-Effects of probability of conception, survival of the pregnancy, and sex of the baby, The New England Journal of Medicine: Allen J.Wilcox, 7 December, 1995

3.The timing of the 'fertile window' in the menstrual cycle:day specific estimates from a prospective study, British Medical Journal: Allen J Wilcox , 18 November 2000

ഈ മരണങ്ങള്‍ നമ്മോട് പറയുന്നതെന്ത്?

2009-11-12T01:17:00.003+05:30

മാത്രുഭൂമിയിലെ ഈ വാര്‍ത്ത, ചര്‍ച്ച ചെയ്ത് എങ്ങുമാകാത്ത ഈ വിഷയത്തിന്റെ ഗുരുതരാവസ്ഥയിലേയ്ക്കാണ് വിരല്‍ ചൂണ്ടുന്നത്. രണ്ടിടങ്ങളിലായി രണ്ട് സ്ത്രീകള്‍ ബൈക്കില്‍ നിന്ന് വീണ് മരിച്ചതാണത്. രണ്ടും ഒരു പോലെ.

ഓടിക്കൊണ്ടിരിയ്ക്കുന്ന വാഹനത്തില്‍ ഇരുന്ന് കുട നിവര്‍ത്തിയപ്പോള്‍ ബാലന്‍സ് തെറ്റിവീണ് തലയിടിച്ചതാണ് മരണകാരണം. സ്വാഭാവികമായും ഹെല്‍മറ്റ് ധരിച്ചിരിയ്ക്കാന്‍ സാധ്യതയില്ല(എന്ന് ഞാന്‍ കരുതുന്നു).

വാഹനമോടിയ്ക്കുന്ന പല പുരുഷകേസരികളും ഹെല്‍മറ്റുപയോഗിയ്ക്കാറുണ്ടെങ്കിലും പുറകിലിരിയ്ക്കുന്ന സ്ത്രീകളും കുട്ടികളും ഹെല്‍മറ്റ് ഉപയോഗിച്ച് കാണാറില്ല. ഇതുപോലെ അപകടങ്ങള്‍ സംഭവിയ്ക്കുമ്പോള്‍ മാത്രമേ പലരും ഗൌരവമായി ഈ വിഷയത്തെ കാണാറുള്ളൂ.

വാഹനമോടിയ്ക്കുന്ന പുരുഷന്റെ അറിവില്ലായ്മയാണോ അതോ പുറകിലിരിയ്ക്കുന്ന കുട്ടികളോടും സ്ത്രീകളോടും ഉള്ള രണ്ടാംകിട മനോഭാവം കൊണ്ടാണോ ഇങ്ങിനെ സംഭവിയ്ക്കുന്നത്? ഒരു പക്ഷേ ശരിയായ അവബോധത്തിന്റെ കുറവുകൊണ്ടായിരിയ്ക്കുമോ?

അങ്ങിനെയെങ്കില്‍ അത് ഒരു സര്‍ക്കാരിന്റെ ബാധ്യതയല്ലേ? ദൃശ്യശ്രാവ്യമാധ്യമങ്ങളില്‍ കൂടി ജനങ്ങള്‍ക്ക് അവബോധമുണ്ടാക്കിയെടുത്ത് നിയമങ്ങള്‍ക്കനുസരിച്ച് ജീവിയ്ക്കാന്‍ ജനങ്ങളെ പ്രേരിപ്പിയ്ക്കുകയെന്നത്? മദ്യപിച്ച് വാഹനമോടിയ്ക്കുന്നത് തടയാന്‍ ഇവിടെ നടത്തിയ stop drink driving campaign ന്റെ പരസ്യചിത്രങ്ങള്‍ youtube ല്‍ കാണാം. ഈ പരസ്യങ്ങള്‍ വന്ന ശേഷം പോലീസ് നടത്തിയ കര്‍ശനമായ റോഡ് പരിശോധനകളുടെയും ഫലമായി ലോകത്ത് മദ്യപാനത്തില്‍ രണ്ടാം സ്ഥാനക്കാരയിരുന്ന ഐറിഷുകാര്‍ ഇന്ന് നാലാം സ്ഥാനത്തായതില്‍ അത്ഭുതമില്ല. പരസ്യങ്ങളെയും നിയമത്തെയും എങ്ങിനെ ഫലപ്രദമായി ഉപയോഗിയ്ക്കാന്‍ കഴിയുമെന്നുള്ളതിന് ഒരു നല്ല ഉദാഹരണമാണിത്.

നാട്ടില്‍ നിന്ന് വിട്ടുനില്‍ക്കുന്നതുകൊണ്ട് സര്‍ക്കാരിന്റെ ഭാഗത്ത് നിന്ന് ഹെല്‍മറ്റുപയൊഗത്തെക്കുറിച്ച് ഈ മാതിരിയുള്ള ഒരു നടപടിയും ദൃശ്യമാധ്യമങ്ങളില്‍ കൂടിയുള്ള ഒരു അവബോധശ്രമമോ ഉണ്ടായതായി അറിവില്ല.

ഇന്ന് ഒരുപക്ഷേ, വാര്‍ത്താചിത്രങ്ങളില്‍ക്കൂടി ഒരു ദാരുണമരണമായി ചാനലുകള്‍ ഇത് അഘോഷിയ്ക്കും, നാളെ മറ്റൊരു ഇരയെത്തേടി അവര്‍ യാത്രയാകും. അപകടമരണങ്ങള്‍ക്കും വാഗ്വാദങ്ങള്‍ക്കുമിടയില്‍ കുറ്റബോധത്തിന്റെ ഉമിത്തീയില്‍ വെന്തെരിഞ്ഞ് അപ്പോഴും ചിലര്‍ മരിച്ച് ജീവിയ്ക്കുന്നുണ്ടാകും. ആര് സമാധാനം പറയും അവരുടെ സങ്കടങ്ങള്‍ക്ക്?

കരടിയെ ആര്‍മിയില്‍ മേജര്‍ ആക്കണം

2009-11-08T15:42:00.003+05:30

കാശ്മീരില്‍ നുഴഞ്ഞുകയറാന്‍ ശ്രമിച്ച രണ്ട് ഭീകരരെ കൊല്ലുകയും മറ്റ് രണ്ടുപേരെ ഗുരുതരമായി പരിക്കേല്‍പ്പിയ്ക്കുകയും ചെയ്ത കരടിയെ ഇന്ത്യന്‍ ആര്‍മി തീര്‍ച്ചയായും ബഹുമാനിക്കേണ്ടതല്ലേ?

വാര്‍ത്ത ഇവിടെ

ആശുപത്രികള്‍ പഠിയ്ക്കുന്നു

2009-09-28T01:08:00.002+05:30

മലയാളമനോരമയിലെ ഒരു വാര്‍ത്ത എന്നെ സന്തോഷിപ്പിച്ചു. കേരളത്തിലെ 5 മെഡിയ്ക്കല്‍ കോളേജുകളിലെയും ഒ.പി നിര്‍ത്തലാക്കുന്നു എന്നതാണത്.

വളരെ വര്‍ഷങ്ങള്‍ക്ക് മുന്‍പ് തന്നെ ചെയ്യേണ്ടിയിരുന്ന ഒരു കാര്യമായിരുന്നു ഇത്. കാര്യമായി അസുഖമില്ലാത്ത ഒട്ടനവധി പേര്‍ കടന്നുകയറി, പലപ്പോഴും ആവശ്യമുള്ളവര്‍ക്ക് അവര്‍ക്കര്‍ഹപ്പെട്ട ചികിത്സ കിട്ടാതെ പോവാറുണ്ട്.
തീര്‍ച്ചയാണ്, പ്രായൊഗികതലത്തില്‍ ഇതിന് ഒട്ടനവധി പ്രത്യാഘാതങ്ങള്‍ ഉണ്ടായേക്കാം. എന്നാലും കാലം ഈ തീരുമാനം ശരിയെന്ന് കാണിച്ചുതരുമെന്ന് തന്നെയാണ് എന്റെ അഭിപ്രായം. വാര്‍ത്ത ഇവിടെ .

ഇതിവിടെ നിന്നാല്‍ പോരാ. രാജ്യത്തെ പ്രധാന ആശുപത്രികളെല്ലാം ഇതുപോലെ റഫറല്‍ ആശുപത്രികളാക്കണം. ജനങ്ങള്‍ പ്രൈമറി ഹെല്‍ത്ത്സെന്ററുകളിലും ജില്ലാ ആശുപത്രികളിലും പോകാന്‍ പഠിയ്ക്കണം. നമ്മുടെ സര്‍ക്കാര്‍ ആശുപത്രികള്‍ക്ക് ആവശ്യക്കാരുണ്ടാകണം. ഉത്തമമായ ചികിത്സകളും റിസര്‍ച്ചുകളും അവിടെനിന്നുണ്ടാവണം.

എത്ര നല്ല നടക്കാത്ത സ്വപ്നം അല്ലേ?

ഇത് ഞാന്‍ പണ്ട് ND TV വാര്‍ത്ത കണ്ടെഴുതിയതാണ്. അന്ന് ആശുപത്രിയ്ക്ക് പുറത്ത് ദിവസങ്ങളോളം കാത്ത് നില്‍ക്കേണ്ടി വരുന്ന രോഗികളേക്കുറിച്ചുള്ള ഒരു റിപ്പോറ്ട്ടായിരുന്നു അതെന്നാണ് എന്റെ ഓര്‍മ്മ . ഇതൊക്കെയാണ് നമ്മളറിയേണ്ടത്, എന്നാല്‍ നമ്മില്‍നിന്നും മറച്ചുവെയ്ക്കപ്പെടുന്നത്.

കണ്ണുചിമ്മുന്ന മാര്‍ബിള്‍ തറയും 21 പ്രാവശ്യം ബി.പി നോക്കുന്ന നഴ്സുമാരുമുള്ള പ്രൈവറ്റ് ആശുപത്രികള്‍ എന്നാണ് എനിക്കുപേക്ഷിയ്ക്കാന്‍ കഴിയുക്?

എന്റെയൊരവസ്ഥ?

മാധ്യമവിചാരവും വിചാരണയും

2009-09-26T05:07:00.002+05:30

കഴിഞ്ഞ ദിവസങ്ങളില്‍ നടന്ന ചൂടുപിടിച്ച ചര്‍ച്ചകളില്‍ നിന്ന് ഒരു സാധാരണക്കാരന്‍ മാധ്യമങ്ങളില്‍ നിന്ന് എന്താണ് പ്രതീക്ഷിയ്ക്കുന്നത് എന്ന് ചിന്ത ഉയര്‍ന്നുവന്നിരുന്നു. ക്രൈം റിപ്പോര്‍ട്ടിങ്ങ് മാധ്യമങ്ങളില്‍ നടക്കുമ്പോള്‍ യഥാര്‍ത്ഥത്തില്‍ നടക്കുന്നത് മാധ്യമ വിചാരണയാണെന്നും പലപ്പോഴും കുറ്റവാളിയുടെ അവകാശങ്ങള്‍ സംരക്ഷിയ്ക്കപ്പെടുന്നില്ലെന്നും ഞാന്‍ കരുതുന്നു.

മാധ്യമധര്‍മ്മങ്ങളെക്കുറിച്ച് നല്ല ഒരു ലേഖനം ഡോ.സെബാസ്റ്റ്യ്ന്‍ പോളിന്റേതായി മാത്രുഭൂമിയില്‍.

ഇവിടെ വായിയ്ക്കാം.

സിയാബ്: നീ ചെയ്യേണ്ടത്

2009-09-21T00:40:00.004+05:30

സിയാബ്, എനിയ്ക്ക് നിന്നെയറിയില്ല.

നിന്നെക്കുറിച്ച് ഞാന്‍ അറിയാന്‍ ഞാന്‍ ശ്രമിച്ചത് ഒരാള്‍ക്കൂട്ടം നിന്നെ കല്ലെറിയുന്നത് കണ്ടിട്ടാണ്.

നീ തെറ്റുചെയ്തിട്ടുണ്ടോ എന്ന് എനിയ്ക്കറിയില്ല. പക്ഷേ, നിന്നെക്കല്ലെറിയാനും നിന്നെ ചെളി വാരിയെറിയാനും ഇവര്‍ക്ക് ആര് അംഗീകാരം കൊടുത്തു?

തെറ്റുകളിലെ ഉത്തരങ്ങള്‍ തേടേണ്ടത് ചന്തയിലല്ല. ഈ രാജ്യത്ത് നിയമമുണ്ട്, അതിന്റെ സംരക്ഷകരുണ്ട്. അവര്‍ ഏറ്റെടുക്കട്ടെ ആജോലികള്‍.

അവര്‍ പറയുന്നു, നീ കള്ളനാണെന്ന്.

ഒരാളുടെ കയ്യില്‍ നിന്ന് കാശുവാങ്ങിയെന്നും നിനക്ക് അസുഖമാണെന്നും നീ ഇന്നലെ വെളിപ്പെടുത്തുകയുണ്ടായി.

വേറെയാരും നിനക്കെതിരെ ആരോപണങ്ങളുമായി വരാത്ത സ്ഥിതിയ്ക്ക് നിന്റെ ഉത്തരങ്ങള്‍ പബ്ലിക് ആവേണ്ട ആവശ്യമില്ല.

നീ ചെയ്യേണ്ടത്: കാശുവാങ്ങിയ വ്യക്തിയെ വിളിച്ച് അവരുടെ എല്ലാ സംശയങ്ങളും തീര്‍ത്തുകൊടുക്കുക. മറ്റാരാടും ഇതിനെക്കുറിച്ച് ചര്‍ച്ച ചെയ്യുകയോ വെളിപ്പെടുത്തുകയോ ചെയ്യേണ്ട.

മറ്റുള്ളവര്‍ക്ക് നീ കള്ളനാണെന്ന് സംശയമുണ്ടെങ്കില്‍ അത് തീര്‍ക്കാന്‍ ഇവിടെ നിയമവ്യവസ്ഥയുണ്ട്, അവരതിന്റെ വഴി നോക്കട്ടെ! മറ്റാരും നീ കബളിപ്പിച്ചുഎന്ന് പറഞ്ഞ് മുന്നോട്ട് വരാത്ത കാലത്തോളം നിന്റെ ഉത്തരങ്ങള്‍ നിനക്ക് മൌനമായി വെയ്ക്കാം.

സാമ്പത്തികമായി നീ വേറെ ആരൊടും കടപ്പെട്ടിട്ടില്ല എന്ന് തോന്നിയതുകൊണ്ടാണ് ഈ അഭിപ്രായം.

നിന്റെ പഠനത്തെക്കുറിച്ചും നിന്റെ ജോലിയെക്കുറിച്ചും മറ്റുള്ളവര്‍ക്ക് വിശദീകരിയ്ക്കേണ്ട ഒരു കാര്യവുമില്ല.

ഇത് ഒരു ജോബ് ഇന്റര്‍വ്യൂ അല്ല, അവരാരും നിനക്ക് ജോലി തരാനും പോവുന്നുമില്ല, അവരുടെ അടുത്ത് നീ പഠിയ്ക്കാന്‍ പോവുന്നുമില്ല. അതുകൊണ്ട് നിന്റെ ജോലിയെക്കുറിച്ചോ, നിന്റെ യോഗ്യതയെക്കുറിച്ചോ ആരുടെയും അടുത്ത് പരാമര്‍ശിയ്ക്കേണ്ട ആവശ്യമില്ല.

നിന്നെ ഒരു മനുഷ്യനായികാണാന്‍ അവര്‍ ആദ്യം പഠിയ്ക്കട്ടേ, എന്നിട്ടുമതി നിന്റെ യോഗ്യതകള്‍ അളക്കാന്‍.

നിന്റെ അസുഖങ്ങള്‍ നീ വെളിപ്പെടുത്തിക്കഴിഞ്ഞു, ഇവിടെ ആര്‍ക്കും അതറിയേണ്ട ആവശ്യമില്ല. ഇനിയെങ്കിലും ഈ വിഷയത്തില്‍ നീ മൌനം പാലിയ്ക്കുക. നീ കാശു വാങ്ങിയെന്ന് ആരോപിച്ച വ്യക്തിയെ മാത്രം വിളിച്ച് സംസാരിയ്ക്കുക.

നമ്മള്‍ കണ്ടുകൊണ്ടിരിയ്ക്കുന്ന ലോകം എത്ര വികൃതമാണെന്ന് നീ മനസ്സിലാക്കുമല്ലോ? നിന്നെക്കുറിച്ച് വന്ന പത്രവാര്‍ത്തകളിലും ചാനല്‍ റിവ്യൂകളും കണ്ട് നിന്റെ പ്രശസ്തിയുടെ രസം നുകരാന്‍ അടുത്തുകൂടിയ ചെന്നായക്കൂട്ടങ്ങളെയാണ് നീ ഇപ്പോള്‍ തിരിച്ചറിഞ്ഞത്.

ഞാന്‍ മുകളില്‍പ്പറഞ്ഞത് ആവര്‍ത്തിയ്ക്കുന്നു...നിനക്ക് കാശുതന്ന് സഹായിച്ച വ്യക്തി പോലീസില്പരാതിപ്പെടാതിരിയ്ക്കാന്‍ അവരെ വിളിച്ച് സംസാരിയ്ക്കുക. നിന്റെ രോഗവിവരങ്ങള്‍ അവര്‍ ആവശ്യപ്പെട്ടാല്‍ മാത്രം അവരോട് വിശദീകരിയ്ക്കുക.

ഐ.എ.എസു കാരും സി.ഐ.ഡികളും

2009-09-20T03:23:00.004+05:30

കുറച്ചുദിവസങ്ങളായി ഒരു മനുഷ്യന്റെമേല്‍ എല്ലാവരും കുതിര കയറുന്നു. വായില്‍തോന്നിയത് മുഴുവന്‍ വിളിച്ചുപറയുന്നു, തെറ്റിദ്ധാരണ പരത്തി ധനാപഹരണം നടത്തിയെന്ന് ആരോപിയ്ക്കുന്നു.

ഇവിടെ കുറ്റാരോപിതന്‍ ഞാനിതുവരെ വായിയ്ക്കാത്ത ഒരു ബ്ലോഗിനുടമയും, മറ്റു പ്രിന്റ്,വിഷ്വല്‍ മാധ്യമങ്ങളില്‍ വാര്‍ത്തകളില്‍ വന്നിട്ടുമുള്ള ഒരു യുവാവാണ്. അയാളുടെ ഭൂതകാലം എല്ലാവര്‍ക്കും സുപരിചിതം, അതേക്കുറിച്ച് എല്ലാ ബൂലോകര്‍ക്കും ഒരേ അഭിപ്രായം.

എന്തുകൊണ്ട് ബൂലോകപത്രപ്രവര്‍ത്തകര്‍ എന്ന് സ്വയം ചമയുന്ന ചിലര്‍ ഈ ഇന്‍‌വെസ്റ്റിഗേറ്റീവ് ആക്രാന്തം കാണിയ്ക്കുന്നു? കാണിക്കേണ്ടിയിരുന്നത് ചങ്കൂറ്റമല്ലേ? അയാള്‍ ഒരു കള്ളനാണയമാണെങ്കില്‍ സൈബര്‍പോലീസില്‍ കേസ് കൊടുത്ത് യഥാര്‍ത്ഥവിവരങ്ങള്‍ പൊതുജനത്തിന് എത്തിയ്ക്കുകയല്ലേ വേണ്ടത്?

മറിച്ച് ഉണ്ടായത് സ്വന്തം ബ്ലോഗില്‍ അയാളെക്കുറിച്ച് ശരിയായതോ അല്ലാത്തതോ ആയ കാര്യങ്ങള്‍ എഴുതിപ്പിടിപ്പിയ്ക്കുകയും അതുവഴി വ്യക്തിഹത്യ നടത്തുകയുമാണ് ചെയ്തത്. ഒരു വ്യക്തിയെക്കുറിച്ച് അയാളുടെ സമ്മതമില്ലാതെ അയാളുടെ മാന്യതയ്ക്ക് കോട്ടം തട്ടുന്ന തരത്തില്‍ പൊതുസ്ഥലത്ത് ചര്‍ച്ച ചെയ്യുന്നത് തീര്‍ച്ചയായും മര്യാദകേടാണ്. പരാമര്‍ശവിധേയനായ വ്യക്തി ഒരു ദരിദ്രപശ്ചാത്തലമുള്ളയാളായതുകൊണ്ട് എന്ത് തോന്ന്യാസവും കാണിയ്ക്കാമെന്നത് നമ്മുടെ നാടിന്റെ മാന്യതയില്ലാത്ത പരിശ്ഛേദം മാത്രമാണ് കാണിയ്ക്കുന്നത്. കുറ്റം തെളിയിയ്ക്കപ്പെടുന്നവരെ ഏതുകുറ്റവാളീയും നിരപരാധിയാണെന്ന നീതി നിഷേധിയ്ക്കപ്പെടുക മാത്രമല്ല, സ്വന്തം ജീവിതം അണുകിട കീറി വാര്‍ത്തയാക്കുന്നത് നോക്കിനില്‍ക്കാനേ നിര്‍ഭാഗ്യവാനായ ഈ യുവാവിന് കഴിയുന്നുള്ളൂ.

എന്താണ് ഈ ബ്ലോഗുകാര്‍ക്ക് വേണ്ടത്?

തങ്ങള്‍ ഇന്വെസ്റ്റിഗേറ്റീവ് ബ്ലോഗ് എന്ന ഒരു പുതിയ സംവിധാനത്തിന്റെ വക്താക്കളാണെന്നോ?

ഇവിടെ സംഭവിച്ച ചില കാര്യങ്ങള്‍:-

ഈ യുവാവിന് അദ്ദേഹത്തിന്റെ അവസ്ഥയില്‍ വിഷമം തോന്നി 47000 ഓളം രൂപ അയച്ചുകൊടുത്ത ഒരു മാന്യവ്യക്തി. ദാനം വളരെ നല്ല കാര്യമാണ്, ദാനം പാത്രമറിഞ്ഞ് വേണമെന്ന് പണ്ട് പാര്‍വതി പറഞ്ഞിട്ടുണ്ട്, ശിവനോട്. വേദപുസ്തകം പറയുന്നു, വലതുകൈ ചെയ്യുന്നത് ഇടതുകൈ അറിയരുതെന്ന്. ഇതെല്ലാം ദാനത്തിന്റെ ഔദാര്യത്തെ മഹത്വല്‍ക്കരിയ്ക്കുന്നു എന്ന് മാത്രമല്ല അത് വാങ്ങുന്ന ആളെ അപമാനപ്പെടുത്തുന്നുമില്ല;

ഇവിടെ അതാണോ സംഭവിച്ചത്? ബഹുമാനപ്പെട്ട മാന്യദയാനിധി ദാനകര്‍ത്താവ് തന്റെ ബൂലോക ഇന്വെസ്റ്റിഗേറ്റീവ് ടീമിനെ സമീപിച്ച് തന്റെ ബാങ്ക് ഡീറ്റയിത്സും താന്‍ ചാറ്റ് ചെയ്ത റെക്കോര്‍ഡും സഹിതം കേസ് രജിസ്റ്റര്‍ ചെയ്തിരിയ്ക്കുന്നു.ഇത് നീതിന്യായവ്യവസ്ഥയൊടുള്ള കടുത്ത നിഷേധമല്ലേ? മാത്രമോ? തന്റെ രോഗവിവരം മറ്റാരോടും പറയരുതെന്ന് പറഞ്ഞ് വാക്കലുള്ള ഉറപ്പിലാണ് ഈ ദാനം സ്വീകരിയ്ക്കാന്‍ യുവാവ് തയ്യാറായത്.

താന്‍ കബ്ബളിപ്പിയ്ക്കപ്പെട്ടുവെന്ന് മനസ്സിലായാല്‍ ഉടനെ പോലീസില്‍ പരാതികൊടുക്കുകയല്ലേ വേണ്ടത്? സാമാന്യബോധമുള്ളവര്‍ അങ്ങിനെയല്ലേ ചെയ്യുക?

ഇതിന് വേണ്ടി നാട്ടില്‍ അന്വേഷണം നടത്തിയ ആളുകള്‍ ഈ യുവാവ് പഠിച്ച സ്ഥലം, പരിചിതര്‍ എന്നിവരുടെ അടുത്തെല്ലാം പോയെന്നും അവരുമായി സംസാരിച്ച് ഇയാള്‍ ഒരു ഐ.എ.എസുകാരനല്ല എന്ന് മനസ്സിലാകിയതയി പറയുന്നു. ഞാന്‍ മനസ്സിലാക്കിയിടത്തോളം അയാള്‍ ഒരു ക്ലെയിം ചെയ്തിട്ടില്ല അങ്ങിനെ(തെറ്റാവാം).

നാട്ടില്‍ അന്വേഷണം നടത്തുന്ന ഈ അന്വേഷകര്‍ ഈ വ്യക്തിയെ നേരിട്ട് പിടിച്ച് നിറുത്തി ചോദിയ്ക്കാത്തതെന്ത്? എല്ലാ ഉത്തരങ്ങളും നേരിട്ട് റെക്കോര്‍ഡ് ചെയ്ത് പോഡ്കാസ്റ്റും ചെയ്യാമായിരുന്നല്ലോ?

Whats the fun in the kill without a chase?

അയാളെ അപമാനിച്ച്, കള്ളനെന്നും കാപട്യക്കാരനെന്നും മുദ്ര കുത്തി, പരാജയപ്പെടുത്തുകയാണ്; സ്വന്തം വ്യക്തി താല്‍പ്പര്യങ്ങള്‍ക്ക് വേണ്ടി.

ഈപ്പറഞ്ഞ വ്യക്തി ഒരു കേന്‍സര്‍ രോഗിയാണെന്നും താന്‍ R.C.C യില്‍ ചികിത്സയിലാണെന്നും അറിഞ്ഞവഴി അവിടെ ചികിത്സ ചെയ്തിട്ടുള്ള ആ പ്രായത്തിലുള്ള എല്ലാ മനുഷ്യരുടെയും വിവരങ്ങള്‍ വേട്ടനായ്ക്കള്‍ക്കിട്ടുകൊടുക്കുന്നു, രോഗികളുടെ വിവരങ്ങള്‍; അത് അസുഖമാകട്ടെ, അവന്റെ അഡ്രസ്സാകട്ടെ എന്തുമാകട്ടെ സംരക്ഷിയ്ക്കാന്‍ ചുമതലപ്പെട്ട ഒരു ഭിഷഗ്വരന്‍.

എവിടെയാണ് നമുക്ക് പിഴച്ചുപോകുന്നത്? സ്വന്തം രോഗത്തെക്കുറിച്ച്, ശപഥം ചെയ്ത ഒരു ഡോക്റ്ററോട് എങ്ങിനെ നമുക്ക് ചര്‍ച്ചചെയ്യാന്‍ കഴിയും? ഞാന്‍ ഒരു ദരിദ്രനാണേങ്കില്‍ എന്റെ അസുഖത്തിനും എന്റെ മാനത്തിനും ഇവിടെ ഒരു വിലയുമില്ലേ? ഇന്‍‌വെസ്റ്റിഗേഷന്‍ എന്നുപറഞ്ഞുനിരങ്ങുന്ന ഏതു തോന്ന്യാസിയ്ക്കും എത്തിനോക്കവുന്നതാണോ നമ്മുടെ മെഡിക്കല്‍ റെക്കോര്‍ഡുകള്‍? അത് കാണിച്ചുകൊടുക്കയാണോ ഉയര്‍ന്ന ജോലിയിയിലിരിയ്ക്കുന്ന ഡോക്ടര്‍മാരുടെ സാമൂഹ്യസേവനം?

ആ ഡോക്ടരുടെ പ്രവൃത്തിയും R.C.C യിലെ രജിസ്റ്ററുകള്‍ എതോ സാധാരണ വ്യക്തികള്‍ക്ക് കാണിച്ച്കൊടുക്കയും അതിനെക്കുറിച്ച് ബ്ലോഗ് പോലെ ഒരു മാധ്യമത്തില്‍ പരാമര്‍ശിയ്ക്കുകയും ചെയ്തവര്‍ക്ക് നേരെയും അന്വേഷണം വേണം. വിവരാന്വേഷണ നിയമപ്രകാരം പോലും ഒരാളുടെ അസുഖവിവരങ്ങള്‍ അയാള്‍ക്കോ അയാളുടെ അടുത്ത ബന്ധുവിനോ മാത്രമേ വെളിപ്പെടുത്തുവാന്‍ പാടുള്ളൂ.

മാനുഷിക പരിഗണന എന്നത് മൌലികാവശമാണ്. അത് ഭരണഘടനയാല്‍ സംരക്ഷിക്കപ്പെട്ടിരിയ്ക്കുകയും ചെയ്തിരിയ്ക്കുന്നു. ഇവിടെ മാനുഷികപരിഗണനകള്‍ നിഷേധിയ്ക്കെപ്പെട്ടിട്ടുണ്ടോ എന്ന് നിയമ വിദഗ്ധര്‍ ചര്‍ച്ച ചെയ്യട്ടെ!

പ്രിയപ്പെട്ട കുന്നംകുളത്തുകാരാ, നിങ്ങള്‍ കള്ളം പറഞ്ഞിട്ടുണ്ടെങ്കില്‍ പോലും നിങ്ങള്‍ക്ക് തിരുത്താനും ഭാവിയില്‍ വലിയ സ്ഥാനങ്ങളില്‍ എത്താനും സമയമുണ്ട്. ഈ കാപട്യങ്ങളെ കണ്ട് ഭയക്കാതെ ധീരമായി മുന്നോട്ട്.

ഒന്നിനെ മാത്രമെ നീ ഭയക്കേണ്ടതുള്ളൂ, നിന്റെ മനസ്സിനെ!

Jean-Claude Romand എന്ന ഒരു ഫ്രഞ്ച്കാരനുണ്ടായിരുന്നു പത്തു മുപ്പത് കൊല്ലങ്ങള്‍ക്ക് മുന്‍പ്. The man who faked his life എന്ന പേരില്‍ ഈയിടെ അയാളുടെ കഥ ഒരു documentary ആയി കാണുകയുണ്ടായി. സമൂഹവും കുടുംബവും പ്രതീക്ഷിച്ചതിനനുസരിച്ച് എത്തിച്ചേരാനാവാതെ വന്നപ്പോള്‍ അതേ ജീവിതം അഭിനയിച്ച ഒരു മനുഷ്യന്‍. ഡോക്ടറല്ലാതിരുന്നിട്ടും w.h.o യില്‍ ഡോക്ടറാണെന്ന് സ്വന്തം ഭാര്യെയെയും കുടുംബത്തെയും വിശ്വസിപ്പിച്ച് എന്നും രാവിലെ ജോലിയ്ക്ക് പോയിരുന്ന ഒരു വ്യക്തി. വളരെ വര്‍ഷങ്ങള്‍ കഴിഞ്ഞ കള്ളം കണ്ടുപിടിയ്ക്കപ്പെട്ടപ്പോള്‍ രണ്ട് കുട്ടികളേയും ഭാര്യയേയും മാതപിതാക്കളെയും കൊന്ന് ആത്മഹത്യയില്‍ അഭയം തേടിയ റോമാണ്ടിനെ ഞാന്‍ വെറുതെ ഓര്‍ത്ത് പോയി. നഷ്ടപ്പെട്ടത് ആര്‍ക്കാണ്? എനിയ്ക്കറിയില്ല.

ലാഭം ആര്‍ക്കാണ്? ചാനല്‍ മുതലാളിമാര്‍ക്ക്! പ്രൈം റ്റൈം സ്റ്റോറി കിട്ടിയല്ലോ അവര്‍ക്ക്.

ഇവിടെയും അത് തന്നെയല്ലേ അവസ്ഥ?

ഒഴിഞ്ഞ സമരപ്പന്തലുകള്‍

2009-04-21T18:26:00.000+05:30

അമേരിക്കയിലെ വേശ്യകളും, മാര്‍പാപ്പയും, അച്യുതാനന്ദനും

2008-12-04T04:15:00.005+05:30

അമേരിയ്ക്കയിലെ വേശ്യാവൃത്തിയെക്കുറിച്ച് കത്തോലിക്കാസഭയ്ക്ക് അഭിപ്രായങ്ങളും അഭിപ്രായവ്യത്യാസങ്ങളും ഉള്ള സമയം; പോപ്പ് ആദ്യമായി അമേരിക്ക സന്ദര്‍ശിച്ചപ്പോള്‍ പത്രപ്രവര്‍ത്തകര്‍ വിമാനത്താവളത്തില്‍ ഒത്തുകൂടി. പാപ്പ വിമാനത്തില്‍ നിന്നിറങ്ങി പത്രക്കാരുടെ അടുത്തു വന്നപ്പോള്‍ ആദ്യത്തെ ചോദ്യം, അമേരിയ്ക്കയിലെ വേശ്യാവൃത്തിയെക്കുറിച്ച് പാപ്പയുടെ അഭിപ്രായമെന്താണെന്നായിരുന്നു. ‘അമേരിക്കയില്‍ വേശ്യകളുണ്ടോ‘ എന്ന അതിശയോക്തി കലര്‍ന്ന ഒരു ചോദ്യമായിരുന്നു പാപ്പ തിരിച്ച് ചോദിച്ചത്.

എന്നാല്‍ പിറ്റേ ദിവസത്തെ പത്രങ്ങള്‍ എഴുതിയത് ഇങ്ങിനെ. വിമാനമിറങ്ങി പാപ്പ ആദ്യം ചോദിച്ചത് അമേരിയ്ക്കയില്‍ വേശ്യകളുണ്ടോ എന്ന്? പാപ്പയുടെ സദാചാരത്തിനെ വരെ കത്തിവയ്ക്കുന്ന തരത്തിലുള്ള പത്രപ്രവര്‍ത്തനത്തിന്റെ ഉത്തമോദാഹരണമാണ് മുകളില്‍ കണ്ടത്. (ഇത് ഒരു കഥ മാത്രമാണെന്ന് ഞാന്‍ കരുതുന്നു).
മുഖ്യമന്തി അച്യുതാനന്ദനെതിരെയുണ്ടായ ആരോപണങ്ങളും മേജര്‍ ഉണ്ണീകൃഷ്ണന്റെ അച്ഛന്‍ നടത്തിയ പത്രസമ്മേളനത്തോടെ പൊളിഞ്ഞുപോയിരിക്കുന്നു. കുടുംബസുഹൃത്ത് അദ്ദേഹത്തിനുവേണ്ടി സംസാരിയ്ക്കുന്നു.
ഭാരതത്തിന്റെ അഭിമാനമായ സന്ദീപിന്റെ കുടുംബത്തെ ഇത്തരമൊരു ആരോപണത്തിലേയ്ക്ക് വലിച്ചിഴച്ചത് മോശമായിപ്പോയി.

മുംബൈ ആക്രമണം, പ്രതിഷേധിച്ച് നാളെ ഹര്‍ത്താല്‍

2008-11-30T02:52:00.006+05:30

ഇന്നലെ രാത്രിയോടെ ഭീകരരെ മുഴുവനോടെ തുരത്തിയെന്ന വാര്‍ത്ത ബര്‍ക്ക ദത്ത് അറിയിച്ചതോടെയാണ് ഞാന്‍ ഉറങ്ങിയത്. അതുവരെ പാതിമയക്കത്തിലും പകുതി ജോലിയിലുമായി ഞാന് ടി.വി യുടെ മുന്നില്‍ ത്തന്നെയായിരുന്നു.

ആദ്യമേ, ഭാരതീയര്‍ക്കുവേണ്ടി ജീവന്‍ ബലി കഴിച്ച എല്ലാ രാജ്യസ്നേഹികളേയും സ്മരിച്ചുകൊള്ളട്ടെ...

എല്ലാ ടി.വി ചാനലുകളും ഇപ്പോള്‍ ഇന്ത്യയുടെ ഭാവി പരിപാടികളേയും പാകിസ്ഥാനുമായുള്ള ബന്ധത്തെക്കുറിച്ചുമാണ് ചര്‍ച്ച ചെയ്യുന്നത്.
ഇന്ത്യ നിസംഗരുടെ ഒരു കൂട്ടമാണ്. അതുകൊണ്ടുതന്നെ ഈ ആക്രമണങ്ങള്‍ മറക്കാനും തീവ്രവാദികള്‍ക്ക് മാപ്പുകൊടുക്കുവാനും നമുക്ക് കഴിഞ്ഞേയ്ക്കും.
പക്ഷേ, രണ്ടു ദിവസം ഉറക്കമിളച്ച് ഞാന്‍ കണ്ട ലൈവ് യുദ്ധം എന്നെ ഭീതിപ്പെടുത്തുന്നത് ക്യാമറക്കണ്ണൂകള്‍ കാണിച്ചുതന്ന ചില രഹസ്യങ്ങള്‍ കണ്ടിട്ടാണ്.

താജ് എന്നാല്‍ ഇന്ത്യയാണെന്നും, താജിനേറ്റ ആക്രമണം സ്വന്തം വീടിനാണെന്നും കരുതുന്ന ഒട്ടനവധി പേരെ ചാനലുകള്‍ കാണിച്ചുതന്നു. അവരെല്ലാം താജില്‍നിന്നും ഭക്ഷണം കഴിയ്ക്കുകയും മാസത്തിലൊരിയ്ക്കലെങ്കിലും താജ് സന്ദര്‍ശിയ്ക്കുന്നവരും ആയിരുന്നു. താജെന്നല്ല, ഒരു തട്ടൂകടയില്‍ പോയി രണ്ടുനേരം വയറുനിറയെ ഭക്ഷണം കഴിയ്ക്കാന്‍ കഴിയാത്തവനു പോലും ഇന്ത്യയെന്നാല്‍ ഒരു വികാരമാണ്; ഭാരതത്തിന്റെ ഒരു മണല്‍ത്തരിയെ ആക്രമിയ്ക്കുന്നതു പോലും സഹിയ്ക്കാന്‍ കഴിയാത്ത, താജില്‍ ഭക്ഷണം കഴിയ്ക്കാന്‍ കഴിയാത്ത, അവരുടെ വികാരങ്ങള്‍ പകര്‍ത്താന്‍ ക്യാമറക്കണ്ണുകള്‍ മറന്നുപോയി, അതിലെനിയ്ക്ക് പരിഭവം. വളരുന്ന ഇന്ത്യയെ, ആംഗലേയം സംസാരിയ്ക്കുന്ന ഇന്ത്യയെ, മാത്രമേ അഭിനവ ചാനലുകാര്‍ക്ക് പരിചയമുള്ളൂ...
കൊല്ലപ്പെട്ട പതിനാലു പോലീസുകാരുടെ, ശിപായിമാരുടെ ആശ്രിതരുടെ കഥകള്‍ ഞാന്‍ കേട്ടില്ല. ഞാന്‍ കേള്‍ക്കില്ല. അവര്‍ ചാവാലിപ്പട്ടികള്‍. മുന്നൂറ്റിമൂന്നാം നമ്പര്‍ രൈഫിളും പേറി മരണത്തിലേയ്ക്ക് ഉറക്കമുണരുന്നവര്‍. കഷ്ടം ഇന്ത്യേ...അറുപതുവര്‍ഷത്തെ സ്വാതന്ത്ര്യം നീ എനിയ്ക്ക് തന്നത്, തളരുന്ന ഇന്ത്യയെ വെറുക്കാനുള്ള കറുപ്പായിരുന്നല്ലോ?

അതവിടെ നിക്കട്ടെ, പറയാന്‍ വന്നത് അതായിരുന്നില്ല. പറഞ്ഞുതുടങ്ങിയപ്പോള്‍ കാടുകയറിയെന്ന് മാത്രം.
ക്യാമറക്കണ്ണൂകള്‍ കാണിച്ചുതന്ന ചിത്രങ്ങളില്‍ ഭാരതത്തിന്റെ രക്ഷാസേനയുടെ പരാധീനതകള്‍ എന്നെ വല്ലാതെ ഭയപ്പെടുത്തുന്നു. സാധാരണ പോലീസുകാരന്റെ കയ്യില്‍ ൪൦ വര്‍ഷം പഴക്കമുളള തോക്കാണെങ്കിലും എന്‍.എസ്.ജി യുടെ കയ്യില്‍ പലവിധ ആയുധങ്ങള്‍ കണ്ടിരുന്നു. എങ്കിലും, അവര്‍ എത്തിപ്പെടാനെടുത്ത സമയം, ആസൂത്രണങ്ങളിലെ പരാജയം, വിജയിയ്ക്കാനെടുത്ത സമയം ഇതെല്ലാം വിമര്‍ശിയ്ക്കപ്പേടുന്നു.

നരിമാന്‍ ഹൌസ് വീണ്ടെടുക്കാന്‍ ഇസ്രയേല്‍ സര്‍ക്കാര്‍ സഹായം വാഗ്ദാനം ചെയ്തത് ഭാരത്തിന്റെ പോരായ്മ വിലയിരുത്തിക്കൊണ്ട് തന്നെയാണ്.അഞ്ചുപേരുടെ ജീവന്‍ നഷ്ടമായ ആ ആസൂത്രണത്തെ ഇസ്രയേല്‍ വിമര്‍ശിച്ചു കഴിഞ്ഞു. എനിക്കോര്‍മ്മ വന്നത്, ൧൯൭൬ ല്‍ ഇസ്രയേല്‍ നടത്തിയ ഓപ്പറേഷന്‍ തണ്ടര്‍ബോള്‍ട്ടാണ്. ഒരു ശത്രുരാജ്യത്ത് പോയി, തട്ടിക്കൊണ്ടുപോകപ്പെട്ട വിമാനവും, യാത്രികരേയും വളരെക്കുറഞ്ഞ നഷ്ടത്തോടെ തിരിച്ച് കൊണ്ടുവരാന്‍ കഴിഞ്ഞത് അവരുടെ ആസൂത്രണത്തിന്റെയും സൈനികരുടെയും മികവുകൊണ്ടാണ്. അവര്‍ ആ സഹായം നമുക്ക് വാഗ്ദാനം ചെയ്തത് വെറുതെയായിരുന്നില്ല. അവര്‍ക്ക് രക്ഷിക്കേണ്ടിയിരുന്നത്, ഇസ്രയേലികളെയായിരുന്നു. എന്നിരിക്കിലും, നമ്മുടെ പോരായ്മകള്‍ ഇവിടെ വല്ലതെ വെളിപ്പെട്ടിരിയ്ക്കുന്നു. നാളെ, ഒരു ശത്രുരാജ്യം നമ്മെ ആക്രമിയ്ക്കുമ്പോള്‍ പ്രതീക്ഷിക്ക്കേണ്ടതെന്തെന്ന് നമ്മുടെ ചാനലുകള്‍ വിദേശികള്‍ക്ക് കാണിച്ചുകൊടുത്തു.
എന്നാണ് നമ്മുടെ സേനയ്ക്ക് സുശ്ശക്തമായ ആയുധങ്ങളും ആസൂത്രണശ്ശേഷിയുള്ള തലവന്മാരുമുണ്ടാവുക? അഞ്ചോളം മണിക്കൂറുകള്‍ എടുത്താണ് കമന്‍ഡോകള്‍ സ്ഥലത്ത് എത്തിയത്, അതും ഒരു ബസില്‍? കാളവണ്ടിയിലാവതിരുന്നത് ഭാഗ്യം.

പ്രതികരണശേഷി നശിച്ച നമ്മള്‍ ഒരിയ്ക്കലും കുറ്റം പറയില്ല. നമ്മുടെ സേനകള്‍ രാഷ്ട്രീയക്കാരന്റെ കിടപ്പറകള്‍ക്ക് കാവല്‍നില്‍ക്കട്ടെ!
നമുക്ക് യുദ്ധം ചെയ്യാന്‍ അരിവാളുകളും വാരിക്കുന്തങ്ങളുമുണ്ടല്ലോ?
അല്ലെങ്കില്‍ വേണ്ട, നാളെ ഒരു ഹര്‍ത്താലായാലോ? അതെ, പാക്കിസ്ഥാന്‍ നടത്തുന്ന ഭീകരാക്രമണങ്ങളില്‍ പ്രതിഷേധിച്ച് നാളെ ഒരു ഹര്‍ത്താല്‍.

മലയാളി എന്തെ ഇങ്ങിനെ? ( വീഡിയോ)

2008-11-10T14:11:00.005+05:30

മലയാളിയുടെ പ്രിയപ്പെട്ട നടന്‍ ഈ കൃത്യത്തിന്‍ മുതിരണമെങ്കില്‍ എന്തു മാത്രം അസഹനീയമായിരിയ്ക്കണം ഈ മലയാളിയുടെ പ്രവൃത്തി. മോഹന്‍ലാല്‍ പ്രകോപിതനായത് ലണ്ടനില്‍ വെച്ച്.
മോഹന്‍ലാലിനെപ്പോലെ മഹാനായ ഒരു കലാകാരന്‍ ഇവിടെ വരുമ്പോള്‍ ശ്രദ്ധിക്കേണ്ട സാമാന്യമര്യാദകള്‍ പോലും സംഘാട്റ്റകര്‍ ശ്രദ്ധിച്ചിട്ടില്ലെന്ന് വേണം ഇതില്‍നിന്ന് മനസ്സിലാക്കാന്‍.
മോഹന്‍ലാലും ശ്രദ്ധ വെയ്ക്കണമായിരുന്നു, തന്റെ ഇമേജ് തകരാത്ത രീതിയില്‍ പരിപാടി ആസൂത്രണം ചെയ്യാന്‍...

ഇപ്പോള്‍ കിട്ടിയത്: പൊതുസ്ഥലത്ത് കൂട്ടം ചേര്‍ന്ന് മൂത്രം ഒഴിച്ചത്, കസേരകള്‍ തല്ലിപ്പൊളിച്ചത്, റ്റൊയിലെറ്റ് വൃത്തികേടാക്കിയത്, തുടങ്ങി വ്യ്ത്യസ്ത കാരണങ്ങളാല്‍ ഇനി മുതല്‍ മലയാളികള്‍ക്ക് ഓണം ആഘോഷിയ്ക്കാന്‍ സ്ഥലം കൊടുക്കേണ്ടെന്ന് കൌണ്‍സില്‍ തീരുമാനിച്ചു.

എന്തെ മലയാളി ഇങ്ങിനെ?

2008-11-05T06:18:00.004+05:30

ഈയിടെ മോഹന്‍ലാല്‍ നടത്തിയ യുറോപ്യന്‍ പര്യടനത്തിന്റെ ചില ദൃശ്യങ്ങള്‍ ആണെന്നെ ഇത് എഴുതാന്‍ പ്രേരിപ്പിച്ചത്.

അയര്‍ലാന്റിലെ താല എന്ന സ്ഥലത്ത് ഒരു‍ ബാസ്കറ്റ് ബോള്‍ കോര്‍ട്ടില്‍ നടത്തിയ പരിപാടി, വളരെ മോശമായി സംവിധാനം ചെയ്ത ശബ്ദക്രമീകരണങ്ങള്‍ കാരണം ആദ്യാവസാനം ബോറായിരുന്നു. മോഹന്‍ലാലിനെപ്പോലെ പ്രശസ്തനായ ഒരു നടനെ അപമാനിയ്ക്കുന്നതിന്‍ തുല്യമായിപ്പോയി ഈ പരിപാടി.

അതല്ല എന്റെ പ്രശ്നം.

പരിപാടി തുടങ്ങിയപ്പോള്‍ തന്നെ കുറെപ്പേര്‍ ഉഡാന്‍സ് തുടങ്ങി. ഒരു മലയാളി ചേട്ടന്‍, കോട്ടും സൂട്ടുമിട്ട് ഉഡാന്‍സുകാരോട് ചെന്ന് സീറ്റിലിരിയ്ക്കാന്‍ പറഞ്ഞു. പോയിപ്പണി നോക്കാന്‍ പറഞ്ഞു പിള്ളേര്‍. അപ്പോള്‍ ചേട്ടന്‍ പോയി വെളുത്ത തൊലിയുള്ള (സായിപ്പന്‍) സെക്യൂരിറ്റിയെ കൊണ്ടുവന്നു. അയാളെ ദൂരെക്കണ്ടതും ഉഡാന്‍സുകാര്‍ തിരികെ സീറ്റിലേയ്ക്ക്.

എന്റെ പ്രശ്നം ഒന്ന്. അഭിമാനക്ഷതം.

മലയാളിയായ ഒരു പ്രോഗ്രാം കോര്‍ഡിനേറ്ററെ അനുസരിയ്ക്കാത്ത മലയാളിപ്പയ്യന്മാര്‍ ഒരു സായിപ്പന്‍ വരുന്നത് കണ്ടപ്പഴേ പേടിച്ച് സീറ്റീക്കേറിയിരുന്നു. എനിയ്ക്ക് തോന്നിയത് പുച്ഛം ലജ്ജ എന്നിവയുടെ ഒരു സമ്മിശ്ര വികാരം. സായിപ്പിനെ കണ്ടാല്‍ കവാത്ത് മറക്കുമെന്ന് പറഞ്ഞതിന്റെ ഒരു ഉത്തമ ഉദാഹരണം. അടിമത്തം ചിന്തയെ നശിപ്പിയ്ക്കും, മാത്രമല്ല അത് തലമുറകളോളം പോകുകയും ചെയ്യും. വെളുത്ത തൊലിയൂള്ളവനെ (കയ്യില്‍ കാശുള്ള, ആഫ്രിക്കക്കാരന് രാജാവാണെങ്കിലും, ഇപ്പോഴും നാട്ടിലെ ചെറുമനേക്കാള്‍ ശകലം മുകളിലേ സ്ഥാനമുള്ളൂ..)കാണുമ്പോള്‍ അവന്‍ പറഞ്ഞത് അപ്പടി അംഗീകരിയ്ക്കാന്‍ നമുക്കൊരു വിഷമവുമില്ല.

പ്രശ്നം രണ്ട്. നാണക്കേട്.

ഉഡാന്‍സുകാരുടെ എണ്ണം കൂടി, പരിപാടി കാണാന്‍ വന്നിരിയ്ക്കുന്ന ഭൂരിഭാഗം കുടുംബങ്ങള്‍ക്കും കാണാന്‍ പറ്റാത്ത രീതിയില്‍ ഉഡാന്‍സുകാര്‍ നിന്ന് തകര്‍ക്കുകയാണ്. അതിലൊരുവന്‍ മൂന്നോ നാലോ വയസ്സുള്ള മകളെ തോളിലേറ്റി മൂക്കറ്റം കുടിച്ചിട്ടാണ് ഡാന്‍സ്. ഇടയ്ക്കൊരിയ്ക്കല്‍ നാടുകാരുമായി ഉരസി സെക്യൂരിറ്റി പിടിച്ചിരുത്തി. അതിന്റെ ബാക്കിപത്രമാവണം പരിപാടിത്തീരുന്നതിന്‍ മുന്‍്പെ രണ്ടുവണ്ടി പോലീസ് സ്ഥലത്തെത്തി. ബാക്കി കാണാന്‍ നില്‍ക്കാതെ ഞാന്‍ സ്ഥലം കാലിയാക്കി.

എന്റെ പ്രശ്നം, ഞാന്‍ ഉത്തരേന്ത്യക്കാരുടെ പല പരിപാടികളും കഴിഞ്ഞ കുറെ വര്‍ഷങ്ങളായി പങ്കേടുക്കുന്നു, ഒന്നിലും മേലെപ്പറഞ്ഞ രീതിയില്‍ അലമ്പ് കണ്ടിട്ടില്ല. എന്താ നമ്മളിങ്ങനെ. മലയാളിയ്ക്ക് സ്വന്തമായി ഒരു സമൂഹ നൃത്തപാരമ്പര്യമില്ല. പരിപാടി സീറ്റിലിരുന്ന് ആസ്വദിച്ച് എഴുന്നേറ്റ് പോകുന്നതാണ് മലയാളിയുടെ ആസ്വാദനം. അപകര്‍ഷതാബോധത്തിന്റെയും, കഴിവില്ലായ്മയുടെയും നിലവിളമാണ് മലയാളി. തീര്‍ച്ചയായും നമുക്കും വേണ്ടതാണ് നൃത്തം ചെയ്യാന്‍ ഒരു ഭാഗം-ഉഡാന്‍സ് ഫ്ലോറ്. പക്ഷെ അതിന്‍ താല്‍പ്പര്യക്കാരുണ്ടാവില്ല, കാരണം അതൊരു ആഘോഷമാക്കാന്‍ കഴിയാത്തത് തന്നെ. ഉത്തരേന്ത്യക്കാരന് നൃത്തം ചെയ്യാനറിയാം. നൃത്തം അവന്റെ ജീവിതത്തിന്റെ ഭാഗമാണ്. വിവാഹത്തിലും, അഘോഷത്തിലും എല്ലാം നൃത്തം ഒരു ഭാഗമാണ്, എന്നാല്‍ മലയാളിയ്ക്ക് അത് ഒരു സ്വപ്നത്തിന്റെ ഭാഗമാണ്. ആ സ്വപ്നത്തിന്റെ സാക്ഷാത്കാരത്തിനുള്ള ശ്രമമാണ് മിയ്ക്കവാറും അലമ്പായിത്തീരുന്നത്.

ഹാ..എന്തു പറയാന്‍....

എട്ടു വ്വയസ്സുകാരിയെ ദുരുപയോഗം ചെയ്തെന്ന

2008-10-15T22:28:00.002+05:30

എട്ടുവയസ്സുകാരിയെ ദുരുപയോഗം ചെയ്തെന്ന വാര്‍ത്ത ദീപികയില്‍ കണ്ടാണ് പോയി നോക്കിയത്. മനസ്സില്‍ ബാലവേല ചെയ്യിപ്പിച്ചെന്നോ മറ്റോ ആയിരിയ്ക്കും ലേഖകന്‍ നിരൂപിച്ചെന്നേ കരുതിയുള്ളൂ. ചെന്നപ്പോഴല്ലെ കഥ; പീഡനമാണ് സംഭവം. ലൈംഗികപീഡനം.
പക്ഷെ, എന്താണീ ദുരുപയോഗം. ചീത്തയായ രീതിയുള്ള ഉപയോഗം ആണെന്നാണ് എന്റെ വിശ്വാസം. ദീപികയ്ക്ക് എങ്ങിനെയെന്നറിയില്ല. അങ്ങിനെയെങ്കില്‍ എന്താണീ വാര്‍ത്ത പറയുന്നത്? എട്ടുവയസ്സുകാരിയെ ശരിയായ രീതിയില്‍ ഉപയോഗിച്ചില്ലെന്നോ? ശരിയായ രീതിയില്‍ പീഡിപ്പിച്ചില്ലെന്നോ?

ലക്ഷക്കണക്കിന് ആളുകള്‍ കാണുകയും വായിയ്ക്കുകയും നോക്കി പഠിയ്ക്കുകയും ചെയ്യുന്ന പത്രമുത്തശ്ശിമാര്‍ ഇങ്ങിനെ തോന്ന്യാസം കാണിയ്ക്കാമോ? മലയാളം നന്നായി പ്രയോഗിയ്ക്കാനറിയാവുന്ന ബൂലോഗവാസികള്‍ ഈ തോന്ന്യാസിയുടെ സംശയങ്ങള്‍ മനസ്സിലാക്കുമെന്ന് കരുതുന്നു.
എവിടേയ്ക്കാണ് നീ എന്റെ മലയാളമേ?????

മലയാളിയുടെ ലൈംഗിക അരാജകത്വത്തിനെതിരെ, ദീപികയുടെ ‘ദുരുപയോഗത്തിനെതിരെ’ പ്രതിഷേധിച്ചുകൊണ്ട്........

ഓണം മലയാളിയുടെ ദേശീയാഘോഷമാണ്. ആണോ?

2008-08-18T17:04:00.001+05:30

ഓണം കേരളീയരുടെ ദേശീയാഘോഷമാണ്. ജാതി മത ഭേദമന്യെ എല്ലാവരും ഓണം ആഘോഷിയ്ക്കുന്നു എന്നെല്ലാം വളരെ ചെറു പ്രായത്തില്‍ തന്നെ നമ്മള്‍ വിദ്യാലയങ്ങളില്‍ പഠിപ്പിയ്ക്കപ്പെടുന്നു. കാലഘട്ടത്തിലെ വ്യതിയാനങ്ങള്‍, ആഘോഷങ്ങളിലെ വാണീജ്യ താല്‍പ്പര്യങ്ങള്‍, മാറി വരുന്ന ദേശീയ കാഴ്ചപ്പാടുകള്‍ എന്നിവയെ വിലയിരുത്തി ഓണവും മലയാളിയും എവിടെ നില്‍ക്കുന്നു എന്ന് കാണാന്‍ ശ്രമിയ്കുകയാണ് ഞാന്‍.
ഇതിനൊപ്പം ഉയര്‍ന്നു കൊണ്ടിരിക്കുന്ന മറ്റൊരു ചോദ്യം, ഓണം ഒരു ഹൈന്ദവ ആഘോഷമാണോ എന്നതാണ്.
എന്താണ് ഓണത്തിന് നമ്മള്‍ ആഘോഷിയ്ക്കുന്നത്? തീര്‍ച്ചയായും മഹാബലിയുടെ തിരിച്ചുവരവ് തന്നെ. അസുരനെ ചതിച്ച ദേവന്റ്റെ ദയാദാക്ഷിണ്യത്താലുള്ള വര്‍ഷത്തിലൊരിയ്ക്കലുള്ള വരവ്. ഇതിനു പുറകിലെ യാഥാര്‍ത്ഥ്യങ്ങളോ, കാലപ്പഴക്കമോ ഞാന്‍ അന്വേഷിയ്ക്കുന്നില്ല, എങ്കിലും പ്രചുര പ്രചാരത്തിലുള്ള ഒരു മിത്തും അതിനോടുചേര്‍ന്നു നിര്‍ക്കുന്ന ഈ ആഘോഷങ്ങളും തീര്‍ത്തും സനാതനം തന്നെ. ഇതുകൊണ്ട് വിവക്ഷിയ്ക്കുന്നത് ഈ ആഘോഷങ്ങള്‍ തീര്‍ത്തും കേരളീയം എന്ന് തന്നെയാണ്. അതുകൊണ്ട് കേരളത്തിലെ ആഘോഷങ്ങള്‍ എല്ലാ മലയാളിയ്കും ആഘോഷിയ്ക്കവുന്നതേയുള്ളു. എന്നാല്‍ ഒരു ഹിന്ദുവും മുസല്‍മാനും കൃസ്ത്യാനിയും ഓണം ആഘോഷിയ്ക്കുന്നത് ഒരു പോലെയാണോ? ഇവിടെ ചരിത്രപരമായി കബളിയ്ക്കപ്പെടുന്നത് ഹിന്ദുവാണ്, ഒരേ സമയം തോല്‍പ്പിയ്ക്കപ്പെട്ട നമ്മുടെ അസുരരാജാവിന്റെ തിരിച്ചുവരവും, തോല്‍പ്പിച്ച അവതാരത്തിന്റെ വിജയാഹ്ലാദങ്ങളും ഒരു നാണയത്തിന്റെ ഇരു ഭാഗങ്ങളായി അവര്‍ ആഘോഷിയ്ക്കുന്നു. എന്നാല്‍ എന്താണ് ഓണത്തിന് ഒരു ഹിന്ദുവിന്റെ ആചാരങ്ങള്‍? അത്തത്തിന് ചാണകം മെഴുകി പൂക്കളമിട്ട്, പത്ത് ദിവസം നീണ്ട്നില്‍ക്കുന്ന വ്യത്യസ്തമായ ആഘോഷങ്ങള്‍, കളികള്‍, മത്സരങ്ങള്‍ , പിന്നെ പത്താം ദിവസം ഓണസദ്യയും ഓണപ്പാട്ടും, വില്ലുപാട്ടും, അങ്ങിനെയങ്ങിനെ. ഓണത്തിന് പൂവിടുന്നതും മാവേലിയ്ക്ക് അട നേദിയ്ക്കുന്നതും അരിമാവ് കളം വരച്ച് കാക്കേരിയപ്പനെ പൂജിയ്ക്കുന്നതും അമ്പലങ്ങളില്‍, പ്രത്യേകിച്ച് വിഷ്ണു ക്ഷേത്രങ്ങളില്‍ വിശേഷപൂജകള്‍ നടക്കുന്നതും ഒരു ഹിന്ദുവിനെ വ്യത്യസ്തനാക്കുന്നു.
പക്ഷേ, മാറിവന്ന കാലത്തില്‍ ഓണം വീട്ടില്‍നിന്ന് റോഡിലേയ്ക്കും,സൂപ്പര്‍മാര്‍ക്കറ്റിലേയ്ക്കും പിന്നെ ഹോട്ടലുകളിലേയ്ക്കും മാറിയപ്പോള്‍ പലരും ഓണം അതാണെന്ന തെറ്റിദ്ധാരണയിലായി എന്നു മാത്രം. അതുകൊണ്ട് തന്നെയാണ് വിദേശങ്ങളില്‍ വസിയ്ക്കുന്ന ഭൂരിഭാഗം വരുന്ന ഹൈന്ദവേതര മത വിശ്വാസികളായ മലയാളികള്‍ക്ക് ഓണം എന്നത് ഒരു പൂക്കളവും അണിഞ്ഞൊരുങ്ങിയ വനിതകളും മിടുക്ക് കാണിയ്ക്കുന്ന കുട്ടികളും പേരിന് ഒരു സദ്യയുമാവുന്നത്. ഓണം എന്ന വികാരത്തിനപ്പുറത്ത് ആഘോഷമെന്ന വിചാരം മുറ്റിനില്‍ക്കുന്ന ഈ പ്രകടനങ്ങള്‍ ഒട്ടുമിക്ക യുറോപ്യന്‍ രാജ്യങ്ങളിലും അമേരിയ്ക്കയിലും കാണാം.പിറ്റെ ദിവസത്തെ ദീപകയില്‍ പടം വരുത്താന്‍ സംഘാടകര്‍ ഇടിച്ചുനില്‍ക്കുകയും ചെയ്യും.

ഓണത്തിന് കേരളത്തിലെ പള്ളീകളില്‍ പ്രത്യേക കുര്‍ബാനയോ, മുസ്ല്യാരുടെ പ്രത്യേക ആശംസകളോ ഉള്ളതായി ഞാന്‍ കേട്ടിട്ടില്ല. മലയാളമനോരമയും മാത്രുഭൂമിയും നടത്തുന്ന ഓണം ഓര്‍മ്മക്കുറിപ്പുകള്‍ മുഴുവനുമില്ലെങ്കില്‍ ഭൂരിഭാഗവും ഹൈന്ദവരുടെതായിരിയ്ക്കും എന്നത് തന്നെ ഓണം ഒരു ഹൈന്ദവ ആചാരമാണെന്ന സമൂഹത്തിന്റ്റെ വിശ്വാസങ്ങളുടെ പ്രതിഫലനമാണ്.
ഇങ്ങിനെയെങ്കില്‍ ഓണം, അതിന്റെ യഥാര്‍ത്ഥ അര്‍ത്ഥത്തില്‍ ഒരു ഭൂരിഭാഗത്തിന്റെ ആഘോഷമല്ലേ? ഒരര്‍ത്ഥത്തില്‍ ഇന്ന് കേരളത്തില്‍ ജീവിച്ചിരിയ്ക്കുന്ന എല്ലാ മലയാളികളും, ഒരു തരത്തില്‍ ഹൈന്ദവര്‍ തന്നെ, മതം മാറിയവരും, ജീവിത രീതികള്‍ കൊണ്ടും...അതു കൊണ്ട് തന്നെ, ആ അര്‍ത്ഥത്തില്‍ ഓണം മലയാളികളുടെ ആഘോഷമാണ്. ഭൂരിഭാഗം വരുന്ന ജനത ഇത് ആഘോഷിയ്ക്കുന്നത് കൊണ്ട് ഓണത്തെ ദേശിയാ‍ഘോഷമായിക്കാണാം.
പിന്മൊഴി:

ഒരു ചാനലിനുവേണ്ടി, വിദേശത്ത് ഓണം കവര്‍ ചെയ്യുമ്പോള്‍ ഉത്ഘാടിച്ച വൈദികനോട് ഒരു ചോദ്യം? നാട്ടില്‍ ഓണം ആഘോഷിയ്കാറുണ്ടോ? ഉത്തരം, ഒരു വളിച്ച ചിരി.

********************************************************************************
എല്ലാ മലയാളികള്‍ക്കും ഓണാശംസകള്‍!!!
നിങ്ങളുടെ വിലയേറിയ കാഴ്ചപ്പാടുകള്‍ ഈ വിഷയത്തില്‍ ഉണ്ടാവുമെന്ന് കരുതുന്നു.

ഭാരതീയന്റെ ദേശീയതയും പരസ്യങ്ങളും

2007-12-23T18:07:00.002+05:30

പരസ്യങ്ങള്‍ എനിക്കിഷ്ടമാണ്, അവ നല്ല സന്ദേശങ്ങള്‍ നല്‍കുമ്പോള്‍.
അവ എന്നോട് സംവദിക്കുന്നതും എനിക്കിഷ്ടമാണ്. ഫലിതത്തിന്റെ നേര്‍ത്ത ചരടുകള്‍ കോര്‍ത്തിണക്കിയവ പ്രത്യേകിച്ചും. പരസ്യക്കാര്‍ കാണിക്കുന്ന പുതിയ ഇന്ദ്രജാലങ്ങള്‍ എനിക്കെന്നും ഇഷ്ടമാണ്. ഒന്നോര്‍ക്കുന്നു, ചാണക്യന്‍ എന്ന സിനിമ റിലീസാവുന്നതിന് ഒരാഴ്ച മുന്‍പ് അതിന്റെ പരസ്യങ്ങള്‍ പത്രത്തില്‍ വന്നിരുന്നു. കമല്‍ഹാസനെയും തിലകനെയും മറ്റും പിടികിട്ടാപ്പുള്ളികളാക്കി പരസ്യം ചെയ്തുകൊണ്ട്. അന്നതെനിക്ക് ഒരു ഷോക്കായിരുന്നു.

അതല്ല ഞാന്‍ പറയാനുദ്ദേശിച്ചത്. ഞാന്‍ ചിന്തിക്കുന്നത് പരസ്യങ്ങളിലെ ദേശീയതയെക്കുറിച്ചാണ്. ദേശീയതയും പരസ്യങ്ങളും തമ്മില്‍ ബന്ധമുണ്ടോ? പരസ്യങ്ങള്‍ ദേശീയതയെ ചൂഷണം ചെയ്യുന്നുണ്ടോ? ഉണ്ടായിരിക്കും, ‍ അവര്‍ക്ക് ചൂഷണം ചെയ്യാന്‍ കഴിയുന്നതെന്തും അവര്‍ ചൂഷണം ചെയ്യും. അവര്‍ മാത്രമല്ല, രാഷ്ട്രീയക്കാരനും കവിയും എന്നുതുടങ്ങി കച്ചവടമനസ്സുള്ള എല്ലാവരും അതുതന്നെ ചെയ്യും.

പക്ഷെ, നമുക്ക് ദേശീയത കലര്‍ത്തിയ വസ്തുക്കള്‍ എത്രമാത്രം ഇഷ്ടമാണ്? ഉദാഹരണത്തിന്, ഇന്ത്യയില്‍ ഉല്‍പ്പാദിപ്പിച്ച കോള എന്ന് പരസ്യം ചെയ്താല്‍ നിങ്ങള്‍ കഴിക്കുമോ? ബെല്ഫാസ്റ്റിലോ, ഫ്രാന്‍സിലോ ഉല്‍പ്പാദിപ്പിച്ചതെന്ന് പറഞ്ഞാലോ? ഇതൊരുപക്ഷേ ഭാരതീയന്റെ മാത്രം കാര്യമായിരിക്കും, അല്ലായിരിക്കും. മൂന്നാം ലോകരാജ്യങ്ങളുടെ മുഴുവന്‍ കാര്യവും ഇങ്ങിനെയായിരിക്കും.

ഈ ചിത്രങ്ങള്‍ ആശയവുമായി പൂര്‍ണ്ണമായി യോജിക്കണമെന്നില്ല, എങ്കിലും നിങ്ങളോട് സംവദിക്കാന്‍ ഇവയ്ക്ക് കഴിയുമെന്ന് കരുതുന്നു. ഐറിഷ് ബീഫ്, ഐറിഷ് പൊട്ടെറ്റോ എന്നെല്ലാം വ്യക്തമായി എഴുതിയാല്‍ അവ കൂടുതല്‍ ചിലവായിപ്പോകും. കാരണം മറ്റൊന്നല്ല, ഇവരെല്ലാം അതില്‍ ദേശീയത കാണുന്നു. അവരുടെ ഉത്പന്നങ്ങള്‍ മറ്റുള്ളവയെക്കാള്‍ ഔന്നത്യമുള്ളതെന്ന് അവര്‍ വിശ്വസിക്കുകയും, സ്വന്തം നാട്ടിലെ കൃഷിക്കാരെ സംരക്ഷിക്കേണ്ടത് സ്വന്തം നിലനില്‍പ്പിന്റെ കൂടി ആവശ്യമാണെന്നും അവര്‍ തിരിച്ചറിഞ്ഞിരിക്കുന്നു. സ്വദേശിയുമായി വന്ന പാവം ഗാന്ധിയെയാണ് ഞാന്‍ ഇവിടെ കൂട്ടിവായിക്കുന്നത്.
ഒരുപക്ഷേ ഒരു കൊളോണിയല്‍ വ്യവസ്ഥയില്‍ വളര്‍ത്തിയെടുക്കപ്പെട്ടവന്റെ ജല്‍പ്പന്നങ്ങളാവാം. എന്തിനെയും ഏതിനെയും ചോദ്യം ചെയ്യുന്ന അപക്വതയാകാം...

പക്ഷേ, എനിക്ക് തോന്നുന്നു, സ്വാതന്ത്ര്യം കിട്ടി 60 കൊല്ലം കഴിഞ്ഞിട്ടും നാം ഒരു മാനസിക അടിമത്തത്തിലാണെന്ന്. നമ്മള്‍ സൃഷ്ടിക്കുന്നവയെ നമുക്ക് തീരെ വിശ്വാസമില്ലാതായിരിക്കുന്നു. എപ്പോഴും പടിഞ്ഞാറന്‍ ഉത്പന്നങ്ങള്‍ നമ്മുടേതിനേക്കാള്‍ മികച്ചതെന്ന് ഒരു അടിയുറച്ച വിശ്വാസം. എന്നാല്‍ പടിഞ്ഞാറിപ്പോള്‍ വില്‍ക്കുന്നവയെല്ലാം ഒന്നില്ലെങ്കില്‍ ചൈനയിലോ, ഇന്ത്യയിലോ നിര്‍മ്മിച്ചതാണെന്ന് മാത്രം.

ഒരുകാര്യം തീര്‍ച്ചും ശരിയാണ്, വില്‍ക്കല്‍ വാങ്ങലില്‍, വാങ്ങുന്നവന്റെ താല്‍പ്പര്യങ്ങള്‍ മാത്രമായിരിക്കണം ശ്രദ്ധിക്കപ്പെടുന്നത്. വാങ്ങുന്നവന്റെ സ്വാതന്ത്ര്യത്തിനുമുന്‍പില്‍ കച്ചവടക്കാരനോ, ദേശീയതയൊ ഒരു പ്രശ്നമല്ല. ആത്യന്തികമായി നോക്കിയാല്‍ ഉത്പന്നങ്ങളുടെ നിലവാരം മാത്രമായിരിക്കണം ശ്രദ്ധ വെയ്ക്കേണ്ടത്. അങ്ങിനെയാണെങ്കില്‍ നമ്മുടെ ഉത്പന്നങ്ങളുടെ മേന്മ നാം കൂട്ടുകയല്ലേ വേണ്ടത്?

പിന്മൊഴി: ഭാരതീയ/ന്‍ യാതൊരു സംശയവും കൂടാതെ മാര്‍ക്കറ്റില്‍ നിന്ന് സ്വന്തമാക്കുന്ന ഭാരതീയമായ ഒരേ ഒരുത്പന്നം എന്താണ്?

ഉത്തരം : ഭര്‍ത്താവ് / ഭാര്യ (കല്യാണ മാര്‍ക്കറ്റില്‍ നിന്ന്)

‘കണക്കില്‍ അംബിക ടീച്ചര്‍ കിങ്ങ് തന്നെ’

2007-12-23T17:50:00.000+05:30

വൌ...
കലക്കന്‍...
കണക്കില്‍ അംബിക റ്റീച്ചര്‍ കിങ്ങ് തന്നെ....അപ്പോ കണക്ക് പഠിപ്പിക്കാന്‍ നേരം അംബിക ടീച്ചര്‍ ലിംഗമാറ്റ ശസ്ത്രക്രിയ നടത്തി ക്ലാസില്‍ വരുന്നു, എന്നല്ലേ അര്‍ത്ഥം. ആ... ആര്‍ക്കറിയാം. പരസ്യപ്പിശാചിനെപ്പറ്റി ഞാന്‍ കുറച്ച് മുന്‍പ് എഴുതിയുരുന്നു. ഇതാ, അടുത്ത വക.
ലിംഗവ്യത്യാ‍സത്തെക്കുറിച്ചുള്ള ഭാഷയിലെ നിയമങ്ങള്‍ പാലിക്കാന്‍ പരസ്യക്കാരനെ ബോധവാനാക്കാന്‍ നമുക്കെന്തുചെയ്യാന്‍ കഴിയും? ആര്‍ക്കാണിവിടെ നേരം, പ്രതികരിയ്ക്കാന്‍...

മലയാളിയുടെ പാര്‍ട്ടിവെയര്‍!

2007-12-16T06:38:00.000+05:30

ഗള്‍ഫിലെ ഏതോ പരിപാടിയില്‍ ഫുള്‍സ്ലീവ് ഷര്‍ട്ടും ടക് ഇന്‍ ചെയ്ത് പാട്ടിനനുസരിച്ച് നൃത്തം ചെയ്യാന്‍ ശ്രമിക്കുന്ന മലയാളി യുവാക്കളെ ചൂണ്ടിക്കാണിച്ച് ഉത്തരേന്ത്യന്‍ ലോബി എന്നെ ചൊറിഞ്ഞപ്പോഴാണ് ‍ മലയാളിയുടെ വസ്ത്രധാരണത്തെക്കുറിച്ച് ഞാന്‍ തല പുകച്ചത്.
ഏതൊക്കെയാണ് / എന്തൊക്കെയാണ് മലയാളി പുരുഷന്മാരുടെ വസ്ത്രങ്ങള്‍?
1.ഷര്‍ട്ടും മുണ്ടും. പോക്കറ്റിന്റെ വലുപ്പമനുസരിച്ച് വിലയുള്ള ഹാഫ് ഷര്‍ട്ട് അല്ലെങ്കില്‍ ഫുള്‍ സ്ലീവ് മടക്കി ഹാഫുമല്ല ഫുള്ളുമല്ല എന്ന അവസ്ഥ.

2.ഫുള്‍ സ്ലീവ് / ഹാഫ് സ്ലീവ് ഷര്‍ട്ടും ട്രൌസേഷ്സും

ഷര്‍ട്ട് ടക് ഇന്‍ ചെയ്തോ അല്ലാതെയോ.

3.ടീ ഷര്‍ട്ട് ടീനേജേഷ്സിന് മാത്രം, അല്ലെങ്കില്‍ അങ്ങിനെ ധരിച്ച് വച്ചിരിക്കുന്നവര്‍ക്ക്.

4.കുറച്ച് കൂടെ കാശുള്ള ചില അണ്ണന്മാര്‍ കോട്ടും റ്റൈയും....

വസ്ത്രധാരണത്തില്‍ വല്ലാതെ സായിപ്പിനെ അനുകരിക്കുന്ന മലയാളി, എന്തുകൊണ്ട് സായിപ്പിന്റെ വസ്ത്രധാരണവുമായി ബന്ധപ്പെട്ട മറ്റു നിര്‍ബന്ധങ്ങള്‍ സ്വീകരിക്കാത്തത്? ഒരു ബ്ലോഗില്‍ ബാങ്കു ജീവനക്കാരെ അമിതവസ്ത്രധാരണം ചെയ്യിപ്പിച്ച് മോഡലുകളാക്കുന്നതിനെതിരെ പ്രതികരിച്ചിരിക്കുന്നത് കണ്ടു. മുഴുവനും തെറ്റാ‍യ ഒരു പ്രവണതയല്ല അത്, ഒരു സുന്ദരിയുടെ ഹാന്‍‌ഡ്ഷെയ്ക്ക് കിട്ടിയതുകൊണ്ട് കം‌പ്യൂട്ടര്‍ പഠിക്കാന്‍ ചേര്‍ന്ന പല യുവ സുഹൃത്തുക്കളും ബൂലോഗത്തുള്ളപ്പോള്‍ പ്രത്യേകിച്ചും. കമ്പനികള്‍ അവരുടെ കസ്റ്റമര്‍ കെയറില്‍ കൂടുതല്‍ ശ്രദ്ധ കൊടുക്കുന്നുവെന്ന് മാത്രം. അവര്‍ കസ്റ്റമര്‍ സര്‍വ്വെ നടത്തുമ്പോള്‍ നമ്മള്‍ തന്നെ പറയും, മാന്യമായി വസ്ത്രം ധരിച്ച, പരിഷ്കാരം തോന്നിപ്പിക്കുന്നവരുടെ സര്‍വ്വീസ് നമ്മളിഷ്ടപ്പെടുന്നുവെന്ന്. അവരതിനനുസരിച്ച് അവരുടെ പോളിസികള്‍ മാറ്റിക്കൊണ്ടിരിക്കും. അതേ സമയം തൊഴിലുടമ തൊഴിലാളിയുടെ വസ്ത്ര ധാരണത്തില്‍ അമിതമായി കൈ കടത്താനും പാടില്ല. ഒരു കാലഘട്ടത്തില്‍ ചുണ്ടില്‍ ചായം തേച്ചവരെ അഭിസാരികമാരായി മുദ്ര കുത്തിയിരുന്ന സമൂഹം ഇന്നതിനെ അംഗീകരിക്കുന്നത് പോലെ ചിലപ്പോള്‍ ഈ ആവശ്യങ്ങള്‍ നാളെയുടെ അനിവാര്യതയായേക്കും.
പക്ഷെ, അതല്ല എന്റെ ചിന്ത. കാഷ്വല്‍ വെയറും പാര്‍ട്ടി വെയറും ഓഫീസ് വെയറും എന്തുകൊണ്ട് മലയാളി ഒന്നു തന്നെയാക്കുന്നു?
മാറ്റങ്ങള്‍ അംഗീകരിക്കാനുള്ള ശേഷിക്കുറവാണോ, പല തരം വസ്ത്രങ്ങള്‍ വാങ്ങിക്കാനുള്ള സാമ്പത്തിക ബുദ്ധിമുട്ടുകളാണോ അതോ വസ്ത്രധാരണത്തിലെ അറിവില്ലായ്മയാണോ?
അറിവില്ലായ്മ തന്നെയെന്ന് എനിക്ക് തോന്നുന്നു, വസ്ത്രം മാന്യമായി ധരിക്കുന്നതിലല്ലെ കാര്യം എന്ന് പലര്‍ക്കും സംശയിക്കാം. ഫുള്‍സ്ലീവ് ഷര്‍ട്ടും ടക് ഇന്‍ ചെയ്ത ട്രൌസറും ധരിച്ച് റ്റെന്നീസ് കളിക്കുന്ന അതേ പൊരുത്തക്കേട് തന്നെയാണ് ഓഫീസ് വെയര്‍ പാര്‍ട്ടിവെയര്‍ ആയി യൂസ് ചെയ്യുമ്പോഴും. ഇതിനെക്കുറിച്ച് ഞാന്‍ ആദ്യമായി ശ്രദ്ധിച്ചത് ഇന്ത്യന്‍ ആര്‍മിയുടെ ഡ്രസ് കോഡ് വായിക്കുമ്പോഴാണ്. പാര്‍ട്ടിവെയറിനെക്കുറിച്ചും കാഷ്വല്‍ വെയറിനെക്കുറിച്ചും നന്നായിതന്നെ പറയുന്നുണ്ടതില്‍.
വസ്ത്ര വൈവിധ്യമില്ലായ്മ മലയാളി പുരുഷന്മാരെ ബുദ്ധിമുട്ടിക്കുന്നുവെന്നതില്‍ സംശയമില്ല. ഒരു നോര്‍ത്തിന്ത്യനെയും മലയാളിയെയും താരതമ്യം ചെയ്താല്‍ വസ്ത്രശുചിത്വത്തില്‍ മലയാളി വടക്കനേക്കാള്‍ വളരെ മുന്നിലാണ്, എന്നാല്‍ അവരുടെ വസ്ത്ര വൈവിധ്യത്തിനു മുന്നില്‍ നാം നാണിച്ച് പിന്മാറുന്നുവെന്ന് തോന്നുന്നു.
നമ്മുടെ വസ്ത്ര സങ്കല്‍പ്പങ്ങളെ ചോദ്യം ചെയ്യേണ്ട സമയമായിരിക്കുന്നു, അല്ലെങ്കില്‍ നമ്മുടെ അറിവില്ലായ്മകള്‍ പരിഹരിക്കേണ്ടതിന്റെ സമയം അതിക്രമിച്ചിരിക്കുന്നു.
പിന്‍:
ഒന്നോര്‍ത്തുനോക്കൂ.. എത്ര ടൂര്‍ പ്രോഗ്രാമുകള്‍ ഫുള്‍ സ്ലീവ് ഷര്‍ട്ടും ധരിച്ച് നിങ്ങള്‍ മസിലുപിടിച്ച് നശിപ്പിച്ച് കാണും? വിഷമിക്കേണ്ട, ഞാനുമുണ്ടാവുമാക്കൂട്ടത്തില്‍.....
പിന്നെ, ഇവിടെ ആഗോള പ്രശസ്തമായ ഒരു കം‌പ്യൂട്ടര്‍ സ്ഥാപനത്തില്‍ ഒരു ദിവസം സന്ദര്‍ശിച്ചപ്പോള്‍ കണ്ടത്-കുളിച്ചിട്ട് മൂന്ന് ദിവസമെങ്കിലുമായിരിക്കുമെന്ന് തോന്നിപ്പിക്കുന്ന തരത്തിലുള്ള വസ്ത്രധാരണം, ജഡ പിടിച്ച മുടി, കീറി പറഞ്ഞ ജീന്‍സ്, വെള്ളം തൊടാത്ത ഷൂ... പ്രോഗ്രാം മാനേജരാണത്രെ!(കംഗാരുവിന്റെ നാട്ടില്‍ നിന്ന്)

ആത്മഹത്യയും ആത്മത്യാഗവും...

2007-11-22T03:35:00.000+05:30

ജീവനൊടുക്കാനുള്ള തീരുമാനമെടുക്കുന്നവനെ ഒരിക്കലും ഭീരുവെന്ന് വിളിക്കാന്‍ കഴിയില്ലെന്ന് ആരോ എവിടെയോ പറഞ്ഞിട്ടുണ്ട്. എല്ലാവര്‍ക്കും സ്വന്തം പ്രാണന്‍ എന്തിനെക്കാളും പ്രിയപ്പെട്ടതായിരെക്കെ, ജീവനൊടുക്കുന്നവര്‍ അതിനെ തൃണവല്‍ക്കരിക്കുന്നതുകൊണ്ടായിരിക്കണം ഇങ്ങിനെ.
പക്ഷെ, ഇന്നത്തെ പത്രങ്ങള്‍ വാര്‍ത്തയാക്കിയത് ഒരു ആത്മത്യാഗത്തിന്റെ കഥയാണ്. മദിരാശിയിലെ ഒരു ഓട്ടോ ഡ്രൈവര്‍ തന്റെ ആത്മഹത്യാകുറിപ്പില്‍ രേഖപ്പെടുത്തിയത്, തന്റെ കണ്ണുകള്‍ മരണശേഷം തന്റെ അനിയന് നല്‍കണമെന്നാണ്. കാഴ്ചശക്തി നഷ്ടപ്പെട്ടൂകൊണ്ടിരിക്കുന്ന സഹോദരന് എങിനെയും കാഴ്ചശക്തി തിരിച്ചുകിട്ടണമെന്ന് രവികുമാ‍ര്‍ ആഗ്രഹിച്ചിരുന്നുവെന്ന് പോലീസ് പറയുന്നു. നിര്‍ഭാഗ്യവശാല്‍ ആത്മഹത്യാക്കുറിപ്പ് കണ്ടെത്തിയത് 6 മണിക്കൂറുകള്‍ക്ക് ശേഷമാണെന്നതും, കോര്‍ണിയ ശസ്ത്രകിയകൊണ്ട് അനിയന്റെ കാഴ്ച തിരിച്ചുകിട്ടില്ലെന്നത് രവികുമാറിനറിയാതെ പോയതും ഇതിനകത്തെ ഒരു ദുരന്തമായി ശേഷിക്കുന്നു.
രവികുമാര്‍ എന്തിനാത്മഹത്യ ചെയ്യണം? ഇതല്ലാതെ മറ്റു വല്ല കാരണങ്ങളും ആത്മഹത്യക്കുണ്ടായിരുന്നോ‍? പത്രങ്ങള്‍ അന്വേഷിച്ചിരുന്നൂവോ? അറിയില്ലാ...
അതുകൊണ്ടൂതന്നെ രവികുമാറിന്റെ മരണത്തെ ഒരു ആത്മത്യാഗമായി വേണം കരുതാന്‍!

വസന്തത്തിലെ ഇടിമുഴക്കം

2007-11-18T22:01:00.000+05:30

1972 ല്‍ ചാരു മജുംദാര്‍ കൊലചെയ്യപ്പെട്ടപ്പോള്‍ ഞാന്‍ ജനിച്ചിട്ടില്ല,പക്ഷേ എനിക്കെന്ന‍പോലെ ഇതു വായിക്കുന്ന മറ്റുപലര്‍ക്കും അദ്ദേഹത്തിന്റെ പ്രസ്ഥാനത്തെ നന്നായറിയാം.കാലഹരണപ്പെട്ടുപോയതെന്ന് നാം തള്ളിപ്പറഞ്ഞ അദ്ദേഹത്തിന്റെ ആശയങ്ങള്‍ ഇപ്പോഴും നിശ്ശബ്ദമായി വേരോടിക്കൊണ്ടിരിക്കുന്നത് എനിക്ക് കാണാം.

ഒരിക്കല്‍ പറ്റിയ അബദ്ധം(70 പതുകള്‍) കോണ്‍ഗ്രസ്സ് മറക്കാനിടയില്ല, അതുകൊണ്ടാണ് ഇന്നലെ നടന്ന സമ്മേളനത്തില്‍ യുവരാജാവ് രാഹുല്‍ഗാന്ധി ‘നിര്‍ധനര്‍ക്കും ജീവിതത്തില്‍ തുല്യാവകാശം’ എന്ന് വിളമ്പിയത്. ആ പ്രസ്ഥാവന, വളര്‍ന്നുകൊണ്ടിരിക്കുന്ന നന്ദിഗ്രാമിലെ സംഭവവികാസങ്ങളുമായി കൂട്ടിവായിക്കണം. അടിയുറച്ച മാര്‍ക്സിസ്റ്റ് വിശ്വാസികള്‍ പോലും ബുദ്ധദേവിന്റെ നടപടികള്‍ തള്ളിപ്പറയുമ്പോള്‍, പാരമ്പര്യ കോണ്‍ഗ്രസ്സുകാരന്റെ മനസ്സിലേയ്ക്ക് ‘വസന്തത്തിലെ ഇടിമുഴക്കം’(Spring Thunder over India-1967)കയറിവന്നതില്‍ അത്ഭുതമില്ല.
സാഹചര്യങ്ങള്‍ ഇന്ത്യന്‍ മണ്ണില്‍ എല്ലായ്പ്പോഴും അനുകൂലമാണ്, മതത്തിന്റെ കറുപ്പ് കഴിച്ച ഉന്മത്തത മാറുകയേ വേണ്ടൂ.ഇന്ത്യ ഒരു ലോകചന്തയായി മാറിക്കഴിഞ്ഞപ്പോള്‍ പാവപ്പെട്ടവന്‍ വീണ്ടും പാവപ്പെട്ടവനും, പണക്കാരന്‍ കൂടുതല്‍ പണക്കാരനുമായി മാറി.ഇപ്പോള്‍ ഭാരതത്തിന്റെ അഭിമാനം കാക്കുന്നത്, ഇംഗ്ലണ്ടില്‍ താമസിക്കുന്ന മിത്തലും,ലോകത്തിലെ ഏറ്റവും പണക്കാരനെന്ന് പത്രങ്ങള്‍ വീമ്പിളക്കുന്ന മുകേഷുമാണ്.ജീവിയ്ക്കാന്‍ ഗതിയില്ലാതെ മക്കളെ മലയാളിയുടെ വീട്ടില്‍ വേലക്കുവിടുന്ന പാവം തമിഴനെയും നാലു മക്കളുമായി ജീവനൊടുക്കിയ കാസര്‍ഗോഡുകാരനെയും ‍തിരിച്ചുപിടിക്കല്‍ എന്നു പേരിട്ട് ബംഗാളില്‍ സി.പി.എം കേഡറുകള്‍ നടത്തിയ പൊളിറ്റിക്കല്‍ മര്‍ഡറുകളും കൂട്ടബലാത്സംഗങ്ങളും നാം കണ്ടില്ലെന്ന് നടിച്ചാല്‍ നമ്മള്‍ എത്തിച്ചേരുന്നത് ആ ഇടിമുഴക്കത്തിലേയ്ക്കായിരിക്കും. സാഹചര്യങ്ങള്‍ അന്നത്തെപോലെ തന്നെ ഇന്നും പ്രബലമാണ്, അതിനിടയ്ക്കാണ് ഇന്ത്യയുടെ രാഷ്ട്രീയ ഭൂപടത്തില്‍ വടക്കുകിഴക്കന്‍ സംസ്ഥാനങ്ങളും,തെലുങ്കാനയുടെ ഭൂരിഭാഗവും കര്‍ണ്ണാ‍ടകയുടെയും തമിഴ്നാടിന്റെയും കേരളത്തിന്റെയും അതിര്‍ത്തികളിലും വന്‍ നക്സലൈറ്റ് സ്വാധീനം ഉണ്ടെന്ന് രഹസ്യാന്വേഷണ വകുപ്പ് കണ്ടുപിടിച്ചത്.സംശയമില്ല, പാളിച്ചകളില്‍ നിന്ന് പാഠങ്ങള്‍ ഉള്‍ക്കൊണ്ട് ജനാധിപത്യത്തിന്റെ മൂല്യങ്ങള്‍ തെറ്റാതെയുള്ള ഒരു വിപ്ലവം ദൂരെയല്ല.
ആരായിരിക്കും ഈ പ്രശ്നങ്ങള്‍ക്കിടയില്‍ മീന്‍ പിടിക്കുക? സംശയമേതുമില്ല, കോണ്‍ഗ്രസ്സുതന്നെ.പാവപ്പെട്ടവന്റെ പാര്‍ട്ടിയെന്ന് ഒരിക്കല്‍ അഭിമാനിച്ച കമ്യൂണിസ്റ്റ് പാര്‍ട്ടികള്‍ ഗുജറാത്തിലെ വര്‍ഗ്ഗീയപാര്‍ട്ടികളെപ്പോലും നാണിപ്പിക്കും വിധത്തിലാണ് കൊലപാതകങ്ങളും കൂട്ടബലാത്സങ്ങളും നടത്തുന്നത്.പാവപ്പെട്ടവനെ സംരക്ഷിക്കേണ്ട ചുമതലയുള്ള ഗവര്‍മ്മേന്റ്, അപ്പര്‍ക്ലാസിനെയും, മിഡില്‍ക്ലാസിനെയും മാത്രമേ കാണുന്നുള്ളൂ...(അങ്ങിനെയൊരു വിവേചനം ഞാന്‍ ഉപയോഗിയ്ക്കാന്‍ പാടില്ലായിരുന്നു).വര്‍ണ്ണ വര്‍ഗ്ഗ ചിന്തകളുമായി മുന്നോട്ട്, സമ്പന്നതയിലേക്ക് പോയിക്കൊണ്ടിരിക്കുന്ന ഈ ഇന്ത്യന്‍ സമൂഹത്തിന് കൂടിവരുന്ന ആത്മഹത്യകളും വിദേശചാനലൂകളില്‍ ഇടയ്ക്കിടെ പ്രത്യക്ഷപ്പെടുന്ന ദരിദ്രക്കുട്ടികളും ഇപ്പോള്‍ നാണക്കേടാണ്. അതുകൊണ്ടാണ് ഈ കൂട്ടക്കൊലപാതകങ്ങള്‍ എന്നെ ജര്‍മനിയിലെ ഗ്യാസ്ചേംബറുകളെ ഓര്‍മിപ്പിയ്ക്കുന്നത്..
അങ്ങിനെയങ്ങിനെ ചൂഷണം ചെയ്യപ്പെട്ട്, മാനം നഷ്ടപ്പെട്ട് അവര്‍ മലയാളിയുടെ അലസസായഹ്നങ്ങാളില്‍, സുഖലോലുപതയുടെ രമ്യഹര്‍മ്മങ്ങളില്‍ ഒരിക്കല്‍ കടന്നുകയറും,പിന്നെ നമ്മുടെ തലയ്ക്കവര്‍ വില പറയും. അതുവരെ ഈ കാര്‍മേഘങ്ങള്‍ നമുക്ക് കണ്ടില്ലെന്ന്നു നടിയ്ക്കാം. പിന്നെ വസന്തത്തിലെ ഇടിമുഴക്കത്തിനായ് കാതോര്‍ക്കാം...

മലയാലവും വരണ്ണമഴയും എന്റെ പരസ്യചിന്തകളും...

2007-08-07T21:15:00.000+05:30

വരണ്ണമഴയായ്, വരണ്ണമഴയായ്...

വിഢിപ്പെട്ടി തകര്‍ക്കുകയാണ് ഈ പരസ്യഗാനങ്ങള്‍; ഇതു മാത്രമോ? വന്നതും വരാന്‍ പോകുന്നതുമായ നൂറനേകം വേറെയും. ഇതിലും കഷ്ടമാണ് 3 സ്കൂള്‍ കുട്ടികള്‍ നടത്തുന്ന സംസാരം, ഏതോ മിഠാ‍യിയെക്കുറിച്ച്...

മലയാളം സംസാരിച്ച് നശിപ്പിക്കപ്പെടുന്നതിനെപ്പറ്റി ഒട്ടനേകം ലേഖനങ്ങള്‍ വന്നു കഴിഞ്ഞുവെങ്കിലും അതിനു കാരണക്കാരെ ആരും ഒന്നും പറഞ്ഞുകണ്ടില്ല. ടി.വി എന്ന മാധ്യമം നമ്മുടെ തലമുറയെ എത്രമാത്രം സ്വാധീനിക്കുന്നുണ്ടെന്ന് പറയാതെ വയ്യ.

എന്തു കൊണ്ടാണ് പരസ്യങ്ങളില്‍ മലയാളികള്‍ മലയാലവും വരണ്ണമഴയും കേള്‍ക്കുന്നത്?

ഇതു ചോദിക്കുന്നത് അല്‍പ്പം കുറ്റബോധത്തോടെയണെന്ന് പറയാതെ വയ്യ. കാരണം ‘കദലി, ചെങ്കദലി’ യും മറ്റും പഞ്ചസാര പോലും ചേര്‍ക്കാതെ വിഴുങ്ങിയവനാണ് ഞാന്‍.മറുമൊഴികളില്‍ മലയാളം ചുവയ്ക്കുന്നത് എന്തോ നമുക്കു വലിയ താല്പര്യമാണെന്നു തോന്നുന്നു. അതുകൊണ്ടുതന്നെയാവണം പരസ്യകമ്പനിക്കാര്‍ വിടാതെ എല്ലാ മലയാളസംഭാഷണവും ഹിന്ദിക്കാരന്‍ മലയാളം പറയുന്നപോലെയാക്കുന്നത്.
പരസ്യകമ്പനിക്കാരനെ കുറ്റം പറയാന്‍ കഴിയില്ല, വില്‍ക്കുക എന്നതാണ് അവന്റെ പ്രാധമികധര്‍മം. അതും ഏറ്റവും നല്ലതായി വില്‍ക്കപ്പെടാന്‍ ശ്രദ്ധിയ്ക്കപ്പെടുന്ന രീതിയില്‍ തന്നെ വച്ചു കാച്ചണം. പിന്നെയതോ മൊഴിമാറ്റം ചെയ്യുമ്പോള്‍ നമ്മളീ കേള്‍ക്കുന്ന പരുവത്തിലുമാവും. വ്യത്യസ്തമായ മലയാളം കേള്‍ക്കുന്നത് ശ്രദ്ധിക്കപ്പെടുമെന്നത് അവന്റെ കച്ചവടതന്ത്രം. അവന് ഭാഷയെ അലങ്കോലമാക്കുന്നതിലോ നന്നാക്കുന്നതിലോ തീരെ താല്പര്യമില്ല.

അപ്പോളെനിക്ക് പരസ്യക്കാരെനെ കുറ്റം പറയാന്‍ കഴിയില്ല. പിന്നെ?

ഇതുമുഴുവന്‍ കണ്ട് മിഴുങ്ങസ്യ എന്നിരിക്കുന്ന എന്നെയോ?അതുപോലെയുള്ള അനേകം മിഴുങ്ങസ്യന്മാരെയുമോ? തീര്‍ച്ചയായും അതെ. പ്രതികരണശേഷിയില്ലാത്ത, ടി.വി തരുന്നതെല്ലാം അതേപോലെ വെട്ടിവിഴുങ്ങുന്ന നമ്മളെതന്നെ...നമുക്കിഷ്ടമല്ലാത്ത പരിപാടികളെക്കുറിച്ച്, പരസ്യങ്ങളെക്കുറിച്ച് അപ്പോള്‍ തന്നെ എഴുതണം. ഇന്റര്‍നെറ്റും ഈ മെയിലും എളുപ്പമായപ്പോള്‍ ഇനിയൊരു തടസ്സം എന്തിന്? വേണമെങ്കില്‍ നമുക്കൊരു ബ്ലോഗു തന്നെ തുടങ്ങാം, നമുക്കിഷ്ടമല്ലാത്ത പരിപാടികളെക്കുറിച്ച്, പരസ്യങ്ങളെക്കുറിച്ച്...

മലയാളം രക്ഷപ്പെടട്ടെ...

എന്താണ്‌ സി.ടി.സ്കാന്‍?

2007-08-06T16:20:00.000+05:30

ആരോഗ്യശാസ്ത്രം വളരെയധികം പുരോഗമിച്ച ഈ കാലത്ത് ഇതിനെക്കുറിച്ച് കേള്‍ക്കാത്തവര്‍ കുറയും. തൊട്ടതിനും പിടിച്ചതിനും സ്കാനിങ്ങും ലാബ്ടെസ്റ്റും എഴുതുന്ന ഡോക്ടര്‍മാരെക്കൊണ്ട് നിറഞ്ഞിരിക്കുന്നു നമ്മുടെ ആശുപത്രികള്‍. എന്തുകൊണ്ടാണ് സ്കാനിങ്ങ് രോഗനിര്‍ണ്ണയത്തില്‍ ഇത്ര പ്രാധാന്യം കൈവരിച്ചത്? എന്താണ് അവയുടെ ഉപയോഗം? എന്താണ് അവയുടെ പാര്‍ശ്വഫലങ്ങള്‍‍?

Computerized Tomography (CT) എന്നാണ് ഇതിന്റെ മുഴുവന്‍ രൂപം. അമേരിക്കക്കാര്‍ ഇതിനെയിപ്പോഴും CAT scan (computerized axial tomography) എന്നാണ് വിളിക്കുന്നത്. ടോമോ എന്ന ഗ്രീക്ക് പദത്തിന് ഛേദം, മുറിവ് എന്നു തുടങ്ങിയ അര്‍ത്ഥങ്ങളുണ്ട്. ഗ്രാഫി എന്ന പദത്തിന് ഇപ്പോള്‍ കൂടുതലും പഠനം എന്ന അര്‍ത്ഥമാണ് ഉപയോഗ്ഗിക്കപ്പേടുന്നത്. അതായത് മനുഷ്യശരീരത്തെ ഛേദങ്ങളാക്കി പഠിക്കുന്ന രീതി. അതുകൊണ്ടുതന്നെയാണ് ഇതിന്റെ പ്രാധാന്യം ഇത്രയധികം വര്‍ദ്ധിക്കാന്‍ കാരണം. ഇതിന്റെ സഹായത്തോടുകൂടി ഡോക്ടര്‍മാര്‍ക്ക് രോഗിയുടെ ശരീരത്തെ കീറിമുറിക്കാതെ തന്നെ ഓരോ അണുവിടയും പരിശോധിക്കാമെന്നായിരിക്കുന്നു.

എന്താണ് ഇതിന്റെ പ്രവര്‍ത്തനരീതി?

മെഡിക്കല്‍ ഇമേജിങ്ങിന്റെ കീഴില്‍ ആണ് സി.ടി സ്കാനിങ്ങ് ഉള്‍പ്പെട്ടിരിക്കുന്നത്. മെഡിക്കല്‍ ഇമേജിങ്ങിനുപയോഗിക്കുന്ന ഉപകരണങ്ങളില്‍ ഭൂരിഭാഗവും രോഗനിര്‍ണ്ണയത്തിന് X-Ray ആണുപയോഗിക്കുന്നത്. അതുകൊണ്ടു തന്നെ ഈയടുത്ത കാലം വരെയും ഈ വിഭാഗം അറിയപ്പെട്ടിരുന്നത് Radiology എന്നാണ്. റേഡിയേഷന്‍ പുറപ്പെടുവിക്കുന്ന അല്ലെങ്കില്‍ ഉപയോഗിക്കുന്ന ഉപകരണങ്ങള്‍ ഉപയോഗിച്ച് സാധ്യമാക്കുന്ന രോഗനിര്‍ണ്ണയത്തിനുള്ള വിഭാഗം എന്നതില്‍ നിന്ന് റേഡിയേഷന്‍ തീരെയുപയോഗിക്കാതെ, അള്‍ട്രാസൌണ്ട്, മാഗ്നറ്റിക് റെസൊണന്‍സ് (MRI)എന്നിവയുപയോഗിച്ച് രോഗനിര്‍ണ്ണയം സാധ്യമായതോടെ ഈ വിഭാഗം മെഡിക്കല്‍ ഇമേജിങ്ങ് എന്നു പേരുമാറ്റുകയായിരുന്നു. സി.ടി. സ്കാനിങ്ങുപയോഗിച്ചുള്ള രോഗനിര്‍ണ്ണയത്തിനുപയോഗിക്കുന്നത് x-ray ആണ്. അതുകൊണ്ടുതന്നെ റേഡിയേഷന്‍ കൊണ്ടുള്ള പാര്‍ശ്വഫലങ്ങള്‍ ഇതുമൂലമുണ്ടാകാം.

സര്‍ ഗോഡ്ഫ്രെ ഹൌണ്‍സ്ഫീല്‍ഡ് എന്ന ശാസ്ത്രഞ്ജന്‍ ആണ് സി.ടി സ്കാനിങ്ങ് കണ്ടുപിടിച്ചത്.

വലിയൊരു ഉഴുന്നുവട പോലെയുള്ള ഒരു ഭാഗവും യാന്ത്രികമായി പ്രവര്‍ത്തിക്കുന്ന ഒരു ടേബിളും വളരെയധികം പ്രവര്‍ത്തനശേഷിയുള്ള ഒരു കമ്പ്യൂട്ടറും അടങ്ങിയതാണ് ഒരു സി.ടി. സ്കാനര്‍. ചിത്രത്തില്‍ കാണുന്ന പോലെയുള്ള ടേബിളിന്റെ പുറത്ത് രോഗി കിടക്കുന്നു. ഉഴുന്നുവട പോലെയുള്ള ഭാഗത്തിനെ(Gantry) എന്നാണ് വിളിക്കുന്നത്. ഇതിനകത്താണ് എക്സ്-റേ രശ്മികള്‍ വമിപ്പിക്കുന്ന ട്യൂബിരിക്കുന്നത്. അവയെ ആഗിരണം ചെയ്ത് അവയുടെ ശേഷി അളക്കുന്ന detector എതിര്‍വശത്തും. രോഗിയുടെ ശരീരത്തില്‍ക്കൂടി കടന്നുപോകുന്ന എക്സ്-റേ രശ്മികള്‍ മറുവശത്ത് എത്തുമ്പോഴേക്കും അവയുടെ intensity യില്‍ കാര്യമായ വ്യതിയാനം സംഭവിച്ചിരിക്കും. ഈ വ്യതിയാനം സംഭവിക്കുന്നത് ശരീരത്തിലെ അവയവങ്ങളുടെ density (മാ‍സ്സ്) അനുസരിച്ചിരിക്കും. കട്ടിയായ ഭാഗങ്ങള്‍, എല്ല്, ലോഹങ്ങള്‍, കല്ല് മുതലായവയില്‍ കൂടി കടന്നു പോകുമ്പോള്‍ എക്സ്-റെ രശ്മികള്‍ കൂടുതല്‍ ആഗിരണം ചെയ്യപ്പെടുകയും അവയുടെ intensity വളരെയധികം കുറ്യുകയും ചെയ്യും. എന്നാല്‍ വായു, കട്ടികുറഞ്ഞ ശരീരഭാഗങ്ങളായ ശ്വാസകോശം എന്നിവയില്‍ക്കൂടി എക്സ്-റെ കടന്നുപോകുമ്പോള്‍ അവയുടെ intensityയില്‍ അത്ര തന്നെ വ്യതിയാനം സംഭവിക്കുകയില്ല. ഈ വ്യതിയാനങ്ങള്‍ എല്ലാം തന്നെ കം‌പ്യൂട്ടര്‍ അനലൈസ് ചെയ്യുകയും അവയെ ഒരു ദ്വിമാന ചിത്രമായി കാണിക്കുകയും ചെയ്യും. ഇപ്പോഴത്തെ കണക്കനുസരിച്ച് ഇതിനെടുക്കുന്ന സമയം ഒരു സെക്കന്റിന്റെ പകുതിയോളമെ വരൂ. ഏറ്റവും പുതിയ ഒരു സ്കാനര്‍ ഉപയോഗിച്ച് ശ്വാസകോശവും വയറും സ്കാന്‍ ചെയ്യാന്‍ എടുക്കുന്നത് വെറും പതിനഞ്ച് സെക്കന്റില്‍ താഴെയാണ്. ഇതു തന്നെയാണ് സി.ടി.സ്കാനെ അപ്പോത്തിക്കരിമാരുടെ ‘ഇഷ്ടവിഭവ’മാക്കുന്നത്.

ഇവിടെകാണുന്നത് ഇതുപോലെ ലഭിച്ച ഒരു ചിത്രമാണ്. വിവരഗ്രാഹ്യമുള്ള ഒരു ഡോക്ടര്‍ക്ക് ഈ ചിത്രത്തിലെ കറുപ്പിലും വെളുപ്പിലും വിവിധ ആന്തരികാവയവങ്ങളെ കണ്ടെത്താന്‍ കഴിയും. അതുമാത്രമല്ല, സാധാരണമായതില്‍ നിന്നും അസാധാരണമായതിനെ തിരിച്ചറിയാന്‍ സാധിക്കുകയും ചെയ്യും. അങ്ങനെയുള്ള ഡോക്ടേഴ്സിനെ റേഡിയോളജിസ്റ്റ് എന്നാണ് വിളിക്കുക.
പുതിയ രീതിയിലുള്ള ഒരു സ്കാനര്‍ ഇതു പോലുള്ള ആയിരത്തോളം ചിത്രങ്ങള്‍ ഏകദേശം 15 സെക്കന്റുകൊണ്ട് എടുത്ത് തീര്‍ക്കും. അതായത് ശരീരത്തെ 1 മി.മി കനത്തില്‍ അരിഞ്ഞ് അതിസൂക്ഷ്മമായ കൃത്യതയോടുകൂടി കാണിച്ചുതരും.

ഈ കാണുന്നത് ഒരു ശവശരീരത്തെ ഇങ്ങിനെ മുറിച്ചതാണ്. ഏകദേശം അതേ ലെവലില്‍.
സി.ടി സ്കാനിലെടുത്ത ചിത്രം ഒറിജിനലിനേക്കാള്‍ മികച്ചുനില്‍ക്കുന്നെന്ന് തോന്നും, ഇതു കണ്ടാല്‍... അല്ലെങ്കില്‍ ശവശരീരത്തിന്റെ ക്രോസ് സെക്ഷനോടുള്ള ഇതിന്റെ സാദൃശ്യം നോക്കിയാല്‍ മതി, ഈ സ്കാനറിന്റെ കഴിവ് മനസ്സിലാക്കാന്‍.

ഇത്രയും പറഞ്ഞതില്‍ നിന്നും തന്നെ സി.ടി. സ്കാന്റെ ഉപയോഗം നിങ്ങള്‍ക്ക് ഏകദേശം മനസ്സിലായിക്കാണും.‍

ഒരു കാലഘട്ടത്തില്‍ രോഗിയെ പരിശോധിച്ച് രോഗലക്ഷണങ്ങള്‍ അനുസരിച്ച് രോഗം കണ്ടുപിടിച്ച ശേഷം ഒരുറപ്പിനുവേണ്ടി സ്കാന്‍ ചെയ്തു നോക്കുന്ന അവസ്ഥയില്‍ നിന്ന് രോഗം കണ്ടിപിടിക്കണമെങ്കില്‍ തന്നെ സ്കാന്‍ ചെയ്തുനോക്കണം എന്ന അവസ്ഥയിലേക്ക് എത്തിയത് തന്നെ നോക്കിയാല്‍ മതി, ആരോഗ്യശാസ്ത്രത്തിന് കിട്ടിയ ഈ കളിപ്പാട്ടത്തിന്റെ വില മനസ്സിലാക്കാന്‍. രോഗനിര്‍ണ്ണയത്തിന് വളരെയധികം സഹായകമാകുന്നു എന്നതുതന്നെയാണ് ഈ വിഭാഗത്തെ ഡോക്ടര്‍മാരുടെ പ്രിയമിത്രമാക്കാന്‍ സഹായകമായത്. ശരീരത്തിലുള്ള ക്യാന്‍സര്‍, മറ്റു ട്യൂമര്‍, പഴുപ്പ്, പക്ഷാഘാതം, ശ്വാസകോശസംബന്ധമായ അസുഖങ്ങള്‍, വാസ്കുലാര്‍ ഡിസീസ് എന്നിവയെല്ലാം അതിസൂക്ഷ്മമായ കൃത്യതയോടുകൂടി കാണാന്‍ സി.ടി.സ്കാന്‍ ഉപകരിക്കും.

നല്ല ഒരു ചിത്രം ലഭിക്കാന്‍ വേണ്ടി ചില മരുന്നുകള്‍ സ്കാനിങ്ങിനു മുന്‍പായി കഴിക്കേണ്ടിവരും, ചിലത് ഇഞ്ചക്ഷനായും നല്‍കേണ്ടിവരും അവയെക്കുറിച്ച് ചിലത്.

ഈ ചിത്രത്തില്‍ ഇടതുവശത്ത് കാണുന്നത് ഇഞ്ക്ഷന്‍ നല്‍കാതെയെടുത്ത ചിത്രവും വലതുവശത്തുള്ളത് നല്‍കിയതിനുശേഷമുള്ളതും. കാണുന്നതില്‍നിന്നു തന്നെ നിങ്ങള്‍ക്കു മനസ്സിലാകും, വ്യത്യാസം. പ്രധാനമായും ബ്ലഡ് വെസ്സല്‍‌സിനെയും ഇന്റസ്റ്റയിനെയും ഉദ്ദേശിച്ചാണ് ഈ മരുന്നുകള്‍ നല്‍കുന്നത്. വളരെയധികം ആറ്റോമിക നമ്പരുള്ള ഏതെങ്കിലും മുലകം ഉപയോഗിച്ചാല്‍ മാത്രമേ എക്സ്-റേയില്‍ കൃത്യമായി കാണാന്‍ കഴിയുകയുള്ളൂ. അയൊഡിനും ബേരിയവും ഇങ്ങിനെയുള്ള മൂലകങ്ങളാണ്. സാധാരണയായി ബേരിയം കുടലുകളുടെ അകവശം കാണുവാനും അയോഡിന്‍ ആര്‍റ്റെറികള്‍ കാണുവാനും ഉപയോഗിക്കുന്നു. ഇപ്പോള്‍ അയഡിന്‍ അടങ്ങിയ സൊല്യൂഷന്‍ തന്നെയാണ് രണ്ടിടത്തും ഉപയോഗിക്കുന്നത്. ആറ്റോമിക നമ്പര്‍ വളരെക്കൂടിയതുകാരണം, ആ ഭാഗത്തെ density വളരെയധികം കൂടുന്നു. ഇതുമൂലം ഈ ഭാഗം മറ്റുള്ള ശരീരഭാഗങ്ങളില്‍ നിന്ന് വേറിട്ട് കാണാന്‍ കാരണമാകുകയും ചെയ്യും. അതുമാത്രമല്ല, ഏതെങ്കിലും തരത്തിലുള്ള അസുഖങ്ങള്‍ ഉണ്ടെങ്കില്‍ ആ ഭാഗം മറ്റു ഭാഗങ്ങളില്‍ നിന്ന് വ്യത്യാസമായികാണുകയും ചെയ്യും, പരിചയമുള്ള കണ്ണുകള്‍ക്ക് മാത്രം. എങ്കിലും ഈ മരുന്നുകള്‍ക്ക് ചില പാര്‍ശ്വഫലങ്ങളുമുണ്ട്. അതുകൊണ്ടുതന്നെ ഈ മരുന്നുകള്‍ എല്ലവരിലും ഉപയൊഗിക്കാന്‍ കഴിയില്ല. പാര്‍ശ്വഫലങ്ങള്‍ സാധാരണയായി അപൂര്‍വ്വമായേ കാണുകയുള്ളൂ, ചെറിയ തടിപ്പുകള്‍, വയറിളക്കം, ശ്വാസതടസ്സം തുടങ്ങി മരണം വരെ സംഭവിയ്ക്കാം. വളരെ സാധാരണമായും അശ്രദ്ധമൂലവും സംഭവിക്കാവുന്ന ഒന്നാണ് റീനല്‍ ഫെയിലിയിര്‍. ഇപ്പോഴും സാധാരണയായി സംഭവിക്കുന്നതും ശ്രദ്ധികപ്പെടാത്തതുമായ ഒന്നാണ് ഇത്.

നേരത്തേ പറഞ്ഞപോലെ ഏറ്റവും പുതിയ ചില സ്കാനറുകള്‍ ഉപയോഗിച്ച് വളരെയധികം ഡീറ്റയില്‍ ആയ ചിത്രങ്ങള്‍ ഉണ്ടാക്കാന്‍ കഴിയും. ഇവ ഉപയോഗിച്ച് വളരെയധികം വേഗത്തില്‍ തന്നെ രോഗനിര്‍ണയം നടത്തുവാന്‍ കഴിയുന്നുവെന്നുമാത്രമല്ല, സര്‍ജറികളും റേഡിയേഷന്‍ തെറാപ്പിയും വളരെയധികം സൂക്ഷ്മമായി നടത്തുവാനും സാധിക്കുന്നു.

ഇവിടെയാണ് ഒരു പ്രശ്നം ഉരുത്തിരിയുന്നത്, ഇതൊക്കെയാണ് ഇതിന്റെ മേന്മകളെങ്കില്‍ എല്ലാവരും ഓരോ സ്കാന്‍ ഇടക്കിടെ എടുക്കുന്നത് നല്ലതായിരിക്കില്ലേ?തീ‍ര്‍ച്ചയായും നല്ലതുതന്നെ, റേഡിയേഷന്‍ എന്നൊരു സംഭവം ഇല്ലായിരുന്നു എങ്കില്‍...അപ്പോള്‍ റേഡിയേഷന്‍ കൊണ്ടെന്താണു കുഴപ്പം? ചെര്‍ണൊബില്‍ പോലെയോ ഹിരോഷിമ പോലെയുള്ള സംഭവങ്ങള്‍ നമ്മള്‍ ഓര്‍ത്തിരിക്കുന്നത് നന്നായിരിക്കും. 10-12Gy ശരീരത്താകെ ലഭിച്ചാല്‍ അയാള്‍ കുറച്ചുസമയത്തിനകത്തുതന്നെ മരിക്കും. എന്നാല്‍ 6-10Gy ഇടയില്‍ റേഡിയേഷന്‍ ഡോസ് ലഭിച്ചവര്‍ ശരിയായ ചികിത്സ ലഭിച്ചാല്‍ ജീവിച്ചിരിക്കാന്‍ സാധ്യതയുണ്ട്. ഇപ്പോള്‍ ലഭ്യമായ സി.ടി.സ്കാനര്‍ നല്‍കുന്ന റേഡിയേഷന്‍ 1-4Gy യ്ക്കും ഇടയ്ക്കാവാം. ഇപ്പോള്‍ തന്നെ ഇതിന്റെ ഉപയൊഗത്തെക്കുറിച്ച് വളരെയധികം ചര്‍ച്ചകള്‍ ആരംഭിച്ചുകഴിഞ്ഞു. 4Gy ഓളം റേഡിയേഷന്‍ കിട്ടിയ ഒരു സ്തീയുടെ തലമുടി 2 ആഴ്ചകള്‍ക്കകം കൊഴിഞ്ഞുപോയത് ഈയിടെ ജപ്പാനില്‍ ചര്‍ച്ചയായിരുന്നു. റേഡിയേഷന്‍ കൊണ്ട് പ്രത്യക്ഷമായും പരോക്ഷമായും കുഴപ്പങ്ങളുണ്ടാകാം. ജനിതകഘടന തന്നെ മാറ്റിമറിയ്ക്കാന്‍ റേഡിയേഷന്‍ കൊണ്ട് കഴിയും. അതുകൊണ്ടുതന്നെയാണ് എത്രമാത്രം ഒഴിവാക്കാമോ, അത്രയും ഒഴിവാക്കണമെന്ന് വിദഗ്ധര്‍ ഡോക്ടര്‍മാരോട് അഭ്യര്‍ത്ഥിക്കുന്നത്.

പിന്നെയെന്തുകൊണ്ടാണ് പിന്നെയും പിന്നെയും സ്കാന്‍ സെന്ററുകള്‍ കൂണുപോലെ പൊട്ടിമുളക്കുന്നത്? ശുശ്രൂഷകന്‍ ഒരു ബിസിനസ്സ്മാന്റെ ചെന്നായത്തോല്‍ അണിയുന്നതുകോണ്ടാണെന്ന് ഞാന്‍ പറയും. ഒരു അവിശുദ്ധ കൂട്ടുകെട്ട് എനിക്കിവിടെ കാണാം. ഓരോ സ്കാന്‍ എഴുതുമ്പോഴും 1000 മുതല്‍ 2500 വരെ കമ്മീഷന്‍ കൊടുക്കുന്ന സ്കാന്‍ സെന്ററുകളും, മാസം 10,000 മുതല്‍ 50,000 വരെ കമ്മീഷന്‍ വാങ്ങിക്കുന്ന ഡോക്ടര്‍മാരും ഇന്ന് കേരളത്തിലുണ്ടെന്ന് ഞാന്‍ പറഞ്ഞാല്‍ ആരും ഞെട്ടണ്ട... ഇവിടെയാണ് റേഡിയേഷന്റെ കാര്യം രോഗിയുടെ മാത്രം കാര്യമാകുന്നത്.

നിങ്ങള്‍ക്കെന്ത് ചെയ്യാന്‍ കഴിയും?

1. റേഡിയേഷന്‍ ചികിത്സകരോട് സ്കാനിങ്ങിനെക്കുറിച്ച് വിശദമായി ചോദിച്ചറിയുക.

2.ഒരു സി.ടി സ്കാന്‍ ആവശ്യമെങ്കില്‍ മാത്രം ചെയ്യുക. ഒരു തലവേദന വന്നാല്‍ ഓടിപ്പോയി സ്കാന്‍ ചെയ്യണമെന്ന് ഡോക്ടറോട് ആവശ്യപ്പെടാതിരിക്കുക.

3.ഡോക്ടര്‍മാരോട് സ്കാനിങ്ങിന്റെ ആവശ്യകതയെക്കുറിച്ച് ചര്‍ച്ച ചെയ്യുക.

4.ആവശ്യമില്ലാതെ സ്കാനിങ്ങ് റൂമില്‍ കയറി നില്‍ക്കാതിരിക്കുക.

5.നില്‍ക്കുകയാണെങ്കില്‍ റേഡിയേഷന്‍ പ്രൊട്ടെക്ഷന്‍ ഏപ്രണ്‍ (കോട്ട്) ചോദിച്ചു വാങ്ങിക്കുക.

6.ആവശ്യമായ രീതിയിലുള്ള ഭകഷണക്രമീകരണങ്ങള്‍ പാലിക്കുക.

7.ഏതെങ്കിലും തരത്തിലുള്ള അലര്‍ജി; ഫുഡ്, മെഡിസിന്‍ എന്നിവയോട് ഉണ്ടെങ്കില്‍ കൃത്യമായും ശുശ്രൂഷകനോട് പറയുക.

8.നിങ്ങള്‍ക്ക് ആസ്ത്‌മ, ഡയബെറ്റിസ് എന്നിവയുണ്ടെങ്കില്‍ നിങ്ങളുടെ ഡോക്ടറെ മുന്‍‌കൂട്ടി അറിയിക്കുക.

9. നിങ്ങള്‍ ഗര്‍ഭിണിയാണെങ്കില്‍, ആണെന്ന് സംശയമുണ്ടെങ്കില്‍, ആ വിവരം ഡോക്ടറോട് പറയാന്‍ മടിക്കരുത്.ആണെങ്കില്‍ സ്കാന്‍ മാറ്റിവെക്കുന്നതാവും ഉചിതം.

അല്ലെങ്കില്‍,

10.സി.ടി.സ്കാനിനു പകരം എം.അര്‍.ഐ ഓ അള്‍ട്രാസൌണ്ടോ (രണ്ടിനും റേഡിയേഷന്‍ ഇല്ല) ഉപയോഗിച്ചാല്‍ മതിയോ എന്ന് ഡോക്ടറോട് ചോദിക്കുക(ഡോക്ടര്‍ക്കും സന്തോഷമാകും, കമ്മീഷന്‍ എം.ആര്‍.ഐ യ്ക്കാണ് കൂടുതല്‍.

ചിത്രങ്ങളോട് കടപ്പാട്:

pictures from :

1.siemens medical webpage

2.Toshiba medical webpage

3.This page

4.This page

5.IMPACT group webpage

ഞാന്‍‌ ഒരു പത്രക്കാരനല്ല, പത്രധര്‍‌മ്മം എനിക്കറിയില്ലാ...

2007-07-15T16:47:00.002+05:30

ഈ ചിത്രങ്ങള്‍ എന്റെ മനസ്സിലുണ്ട്, കുറെ നാളുകളായി. അവക്കെന്റെ ഉറക്കം കളയാനായിട്ടില്ലെങ്കിലും ഒരസ്വസ്ഥത എന്നിലുണ്ടാക്കാന്‍ അവയ്ക്കു കഴിഞ്ഞു എന്നത് അസത്യമാകില്ല. ഈ അസ്വസ്ഥത ഭയമോ, അനുബന്ധ വികാരങ്ങളോ ഉളവാക്കുന്നതല്ലാ, മറിച്ച്‍ അവയുടെ ശരി തെറ്റുകളെക്കുറിച്ചാണ് എന്റെ വിചാരങ്ങള്‍.

ചാനലുകളില്‍ ഉപയോഗിക്കുന്ന ചിത്രങ്ങള്‍, പരിപാടികള്‍ എന്നിവയാണ് ഈ ചിന്തകള്‍ക്കാധാരം. വിവിധ ചാനലുകള്‍ ഈയിടെയായി അവരുടെ ‘സര്‍ഗ്ഗാത്ത്മകത’ വെളിവാക്കുന്നത് ഏറ്റവും പച്ചയായി വാര്‍ത്തകള്‍ ചിത്രീകരിച്ചുകൊണ്ടാണ്. ഞാന്‍ ഒരു പത്രക്കാരനല്ലാ, പത്രധര്‍മ്മം എനിക്കറിയില്ലാ, എന്നാലും വായനയുടെയും കാഴ്ചയുടെയും അതിര്‍വരമ്പുകള്‍ ഇതു സംബന്ധിച്ച് നമ്മള്‍ നിശ്ചയിരുന്നത് മാറുന്നുവോ എന്നെനിക്ക് സംശയം. ഇതിനെക്കുറിച്ച് ഞാന്‍ നടത്തിയ വായനയില്‍ ലോകര്‍ മുഴുവന്‍ ഇങ്ങിനെ പലവിധത്തിലുള്ള അടിച്ചേല്‍പ്പിക്കലുകളില്‍ അസ്വസ്ഥരാണെന്ന് എഴുതപ്പെട്ട് കണ്ടു.

1. മൃതദേഹങ്ങള്‍: അപമൃത്യുവിനിരയായവരെയാണ് ചാനലുകള്‍ക്കേറെയിഷ്ടം. അറ്റുപോയ കാലുകള്‍, ഒടിഞ്ഞു നുറുങ്ങിയ കൈകാലുകള്‍, കഴുത്തറ്റ ദേഹം, മീനും മറ്റു ജലജീവികളും തിന്ന് വികൃതമാക്കിയ മുഖം, വെള്ളം കുടിച്ച് വയറു വീര്‍ത്ത് പൊട്ടിയ നിര്‍ഭാഗ്യര്‍, വെന്തുരുകിയ മിഴികളുടെ സ്ഥാനത്ത് തെളിഞ്ഞു കാണുന്ന കപോലം മുതലായവ.

2. കൊലപാതകങ്ങള്‍: പലരും ഓര്‍ക്കുണ്ടാവും തിരുവനന്തപുരത്ത് മുക്കിക്കൊല്ലപ്പെട്ട ആ മനുഷ്യനെ...ഒരു ചാനല്‍ ഒരാഴ്ച അതിന്റെ സം‌പ്രേഷണം ആഘോഷിക്കുകയുണ്ടായി. ആനയുടെ ചവിട്ടും കുത്തുമേറ്റ് മൃതിയടയുന്ന പാപ്പാന്മാര്‍, അവരുടെ വലിച്ചുകീറപ്പെടുന്ന മൃതദേഹങ്ങള്‍.

3.സ്വകാര്യത: കുറ്റവാളികളെപ്പോലെ വേട്ടയാടപ്പെടുന്ന (ഇതിനേക്കാള്‍ യോജിച്ച ഒരു വാക്കില്ല) കുറ്റവാളികളുടെ ബന്ധുക്കള്‍, ചാനലുകളിലെ ‘കരണ്‍ ഥാപര്‍’ മാര്‍, എന്തെങ്കിലും കാരണത്താല്‍ വീട് വിടേണ്ടിവന്ന ചെറുബാല്യങ്ങളുമായി നടത്തുന്ന വികലമായ ഭാഷയിലുള്ള ‘കൂടിക്കഴ്ചകള്‍‘. അരപ്പട്ടിണി മാറ്റാന്‍ തുണിയുരിയേണ്ടി വന്നവളുടെ പി. ആര്‍. ഒ. ആയി നടക്കുന്ന ചാനല്‍ ക്യാമറാമാന്‍...

4. തമാശ: റോഡില്‍ക്കൂടി നടന്നുപോകുന്നവന്റെ പുറകെ പടക്കമേറിഞ്ഞ് അവന്റെ പുറകേ ഓടിച്ചെന്ന് ‘കേമറ കണ്ടോ’ എന്നു പറയുന്ന ‘ഹൃദയസ്തംഭനം’ വരെയുണ്ടാക്കാവുന്ന ‘തമാശകള്‍’.

വിഷയവിവരമുള്ളവര്‍ ഇതിനെക്കുറിച്ച് തര്‍ക്കം തുടങ്ങിയിട്ട് നാളുകുറെയായി. അവരിതിന്റെ നിയമവശങ്ങളെക്കുറിച്ചും ഇതിന്റെ സാധൂകരണത്തെക്കുറിച്ചുമാണ് കൂടുതല്‍ വ്യാകുലരാകുന്നത്. ഒരു സാധാരണക്കാരന്‍ മലയാളിയുടെ സായാഹ്നങ്ങളെ സമ്പന്നമാക്കാന്‍ ശ്രമിക്കുന്ന ചാനലുകാരന്റെ സദാചാരത്തിനെ എനിക്കെങ്ങിനെ വില പറയാന്‍ കഴിയും?

എന്റെ പരാജയവും അസ്വസ്ഥതയും അവിടെയാണാരംഭിക്കുന്നത്.

എന്താണ് നമുക്ക് സ്വീകാര്യമായത്, നമ്മുടെ വരും തലമുറകള്‍‍ കണ്ടുവളരേണ്ടത് കൊലപാതകങ്ങളും പീഡനങ്ങളുമാണോ? ഒരു സിനിമ കാണുമ്പോള്‍ അതിനെ വലിയവര്‍ക്കും, കുട്ടികള്‍ക്കും, എന്നെല്ലാം തരം തിരിക്കുന്ന പോലെ എന്തുകോണ്ട് ചാനലുകളില്‍ വരുന്നതിനെ സമയബന്ധിതമായി തരംതിരിച്ചുകൂടാ?

മരണം, കൊലപാതകം തുടങ്ങി മേല്‍പ്പറഞ്ഞവയെല്ലാം തന്നെ ഒരു തരത്തില്‍ വാര്‍ത്താപ്രാധാന്യം ഉള്ളവ തന്നെ. അതുമല്ലേങ്കില്‍ അവയ്ക്ക് ‘migrant mother' എന്ന ഫോട്ടൊയിലെ നായികയ്ക്ക് ഈ ചിത്രം പ്രസിദ്ധീകരിച്ചതിന് ശേഷമുള്ള അനുഭവങ്ങള്‍ പോലെയുള്ളതായിരിക്കും ഇതിന്റെ പ്രാധാന്യം എന്നു ചൂണ്ടിക്കാണിക്കപ്പെടും. kevin Carterടെ pulitzer winning ചിത്രം ഇത്തരുണത്തില്‍ ഓര്‍ക്കേണ്ടിവരുന്നു. കഴുകന്‍ കൊത്താനിരിക്കുന്ന, മരണം കാത്തിരിക്കുന്ന ഒരു കുട്ടിയുടെ ചിത്രം കുറെയേറെ ഉത്തരമില്ലാത്ത ചോദ്യങ്ങള്‍ ഉയര്‍ത്തിയിരുന്നു. ഒരു പത്രപ്രവര്‍ത്തകന്റെ സാമൂഹ്യപ്രതിബദ്ധത ചോദ്യംചെയ്യപ്പെട്ട ഒരു സംഭവമായി ലോകമതിനെ കണക്കാക്കി. ഇതിനിടെ സ്വകാര്യതയിലേക്കുള്ള കടന്നുകയറ്റത്തിന് പല ലോകസുന്ദരിമാരും പത്രപ്രവര്‍ത്തകരെ കോടതി കയറ്റുകയുമുണ്ടായി. എന്നിരിക്കിലും ജേര്‍ണലിസവും, മഞ്ഞപ്പത്രവും തമ്മിലുള്ള അകലം ആധുനിക കാലഘട്ടത്തില്‍ കുറഞ്ഞുവെന്ന് സമ്മതിക്കാതെ വയ്യ. പ്രേക്ഷകന്‍ ആവശ്യപ്പെടുന്നത് കാഴ്ച വക്കുക എന്ന മിനിമം പരിപാടി നടത്തുകയാണോ നമ്മുടെ മാധ്യമങ്ങള്‍ എന്നും സംശയിക്കേണ്ടിയിരിക്കുന്നു.

ഇതൊക്കെയാണെങ്കിലും ചില കാഴ്ചകള്‍ മറക്കപ്പെടേണ്ടതല്ലേ എന്നൊരു സംശയം എന്നില്‍ അവശേഷിക്കുന്നു. ഉദാഹരണത്തിന് 9/11 നടന്നപ്പോള്‍ അമേരിക്കന്‍ ചാനലുകള്‍, മരിച്ചുവീണവരെയും വളരെയധികം മുറിവുപറ്റിയവരെയും പ്രക്ഷേപണത്തില്‍ ഉള്‍പ്പെടുത്തിയില്ല എന്നു ഞാന്‍ വായിക്കുന്നു. നേരെ മറിച്ച് ബോംബെ ട്രെയിന്‍ സ്ഫോടന്മുണ്ടായപ്പോള്‍ അതില്‍ മരിച്ചവരുടെയും ഭീകരമായി മുറിവു പറ്റിയവരെയും പ്രൈം ടൈമില്‍ തന്നെ കാണിക്കുകയായിരുന്നു. ഒരു പക്ഷേ പ്രക്ഷേപണനിയമങ്ങളിലുള്ള വ്യത്യാസമോ ജനതയുടെ സഹനശക്തിയുടെ ആവൃത്തിയെയോ മാനദണ്ഡമാക്കിയായിരിക്കണം ഈ വ്യത്യാസം; അല്ലെങ്കില്‍ ഞാന്‍ ഏറെ ഭയപ്പെടുന്ന, പ്രതികരണശേഷിയില്ലാത്ത ജനങ്ങളിലേക്ക് എന്തും അടിച്ചേല്‍പ്പിക്കാം എന്ന പത്ര / ചാനല്‍ മുതലാളിമാരുടെ താന്‍ പോരിത്തമോ?

എന്താണ് കാണിക്കാന്‍ പാടില്ലാത്തത്, എന്ത് കാണിക്കണം, സഭ്യമേത്, അസഭ്യമേത് എന്നെല്ലാം സദാചാരപ്പോലീസുകാര്‍ തല്ലുപിടിക്കട്ടെ, എന്റെ മേഖല, കാണിക്കാന്‍ നിശ്ചയിച്ച, കാണിച്ചിരിക്കേണ്ട ഒരു കഥ /ചിത്രം എങ്ങിനെ കാണിക്കുന്നുവെന്നാണ്. നേരത്തെ പറഞ്ഞ പോലെ വികൃതമാക്കപ്പെട്ട ഒരു മൃതദേഹം കാണിക്കണമെങ്കില്‍, അതിന്റെ വൈകൃതം ഫോകസില്‍ നിന്ന് മാറ്റുകയോ, മാസ്ക് ചെയ്യുകയോ ആവാം. കഴിഞ്ഞ ദിവസം ഒരു ചാനലില്‍, ന്യൂസില്‍‍ കാണിച്ച ഒരു മൃതദേഹത്തിന് മുഖമുണ്ടായിരുന്നില്ല, മത്സ്യദംശമേറ്റ് എല്ലാം വികൃതമായിരുന്നു. മരിച്ചു പോയ ആ യുവാവിന്റെ മൃതദേഹത്തിന് അര്‍ഹിക്കുന്ന പരിഗണന ലഭിച്ചില്ലെന്നു മാത്രമല്ല, ജീവിച്ചിരിക്കുന്ന അയാളുടെ മാതാപിതാക്കളെയും സുഹൃത്തുക്കളെയും കുറെ നാള്‍ കൊല്ലാതെ കൊല്ലില്ലേ, ചാനല്‍ തമ്പുരാന്റെ ഈ പ്രക്ഷേപണ വിക്രിയകള്‍? ഡയാന രാജകുമാരി കാറപകടത്തില്‍ കൊല്ലപ്പെട്ടപ്പോള്‍, മരണത്തിന് തൊട്ട് മുന്‍പ് എടുത്ത ചിത്രങ്ങള്‍, പോലീസ് വിട്ട് കൊടുത്തത് ഈയിടെയാണ്. ബ്രിട്ടനിലെ ചാനല്‍ 4 അത് ഒരു ഡോക്യുമെന്ററിയായി കാണിച്ചിരുന്നു. ഈ കാണിക്കുന്നതിനെതിരെ ഡയാനയുടെ മക്കള്‍ രംഗത്ത് വന്നിരുന്നു. അല്‍പ്പജീവനുമായി, സ്വന്തം അമ്മ വികൃതമായ ശരീരവുമായി കിടക്കുന്നത് കാണാന്‍ വയ്യെന്ന ന്യായം, ബ്രിട്ടനില്‍ പ്രക്ഷേപണ രാജാക്കന്മാരുടെയിടയില്‍ വലിയൊരു തലവേദനയായിരുന്നു. എന്നിരിക്കിലും, ഡയാന, ഒരമ്മയെന്നതിലുപരി, ബ്രിട്ടിഷുകാരന്റെ ആത്മാഭിമാനവും, അവരുടെ സുന്ദരിയുമായ രാജകുമാരിയും, ലോകം മുഴുവന്‍ ഇഷ്ടപ്പെടുന്ന കാരുണ്യപ്രവര്‍ത്തകയുമായിരുന്നു എന്ന കാരണത്താല്‍ അവരുടെ അന്ത്യനിമിഷങ്ങള്‍ ലോകം കാണട്ടെയെന്ന വാശിയില്‍ മാധ്യമഭീമന്‍ ജയിക്കുകയുണ്ടായി. സം‌പ്രേഷണം ചെയ്യപ്പെട്ട ഭാഗങ്ങളില്‍ അരുതാത്തതൌന്നുമുണ്ടെന്നു എനിക്ക് തോന്നിയില്ല.

ബ്രീട്ടീഷ് കിരീടവകാശിക്ക് ലഭിയ്ക്കാത്ത സൌജന്യം, പുലന്തറക്കേല്‍ കൊച്ചൌസേപ്പ് മകന്‍ ജോണിക്കുട്ടീ, നിനക്ക് വാങ്ങിച്ച് തരാന്‍ എനിക്ക് കഴിയുമെന്ന് തോന്നുന്നില്ല...(ഇത് പറഞ്ഞാരും തല്ലുപിടിക്കേണ്ട, ബ്രിട്ടീഷ് കിരീടവകാശിക്ക് സാധാരണക്കാരനില്‍ നിന്ന് ഒരു വ്യത്യാസവുമില്ല, കുറച്ച് കഷ്ടമാണേങ്കിലേയുള്ളൂ).

ഇതു മരിച്ചവരുടെ കാര്യം. മരിക്കാതെ നിരന്തരം ചാനലുകളില്‍, ഇന്റര്‍വ്യൂ എന്ന പേരില്‍, അന്വേഷണം എന്ന പേരില്‍ കൊല ചെയ്യപ്പെടുന്നവരെയ്ക്കുറിച്ചോ? ആരാണ് ഇവര്‍ക്കീ അധികാരം ‍കൊടുത്തത്? നമ്മുടെ സ്വകാര്യതയില്‍ കടന്നുകയറാനും നമ്മളെ ചോദ്യം ചെയ്യാനും? സ്വതവേ അന്തര്‍മുഖനായ മലയാളിയുടെ നിര്‍വികാരത്തെ ചൂഷണം ചെയ്യുകയല്ലേ ഈ ചാനല്‍കള്ളന്മാര്‍? ഇക്കഴിഞ്ഞ ദിവസങ്ങളില്‍ ബാങ്ഗ്ലൂരില്‍ നടന്ന സംഭവങ്ങള്‍ ഇതിന് തെളിവാണ്. ഗ്ലാസ്ഗോ‍വില്‍ നടന്ന സ്ഫോടനത്തെക്കുറിച്ച് അറിയാന്‍ അതിലൊരാളുടെ വീട് അതിക്രമിക്കുകയാരിരുന്നു, മാധ്യമപ്പട. ശരിയാണ്, അയാള്‍ തീവ്രവാദിയാണ്, എന്നാലും ഒരുപക്ഷേ അയാളുടെ മാതാപിതാക്കള്‍ക്ക് ഒന്നുമറിയില്ലേങ്കിലോ? മകന്‍ നഷ്ടപ്പെട്ട വേദന തീരും മുമ്പേ ചാനല്‍ കോടതിയില്‍ അവര്‍ വിചാരണ ചെയ്യപ്പെടുകയുണ്ടാ‍യി. ഡേവിഡ് ബെകാമിന്റെയും, വിക്റ്റോറിയയുടെയും മക്കളുടെ ചിത്രമെടുക്കാന്‍ ശ്രമിച്ച ഫോട്ടൊഗ്രാഫര്‍ക്കെതിരെ, ചീറിയടുക്കുന്ന വിക്ടൊറിയയുടെ ചിത്രം ഈയിടെ കണ്ടിരുന്നു. പക്ഷേ അതില്‍ അവരുടെ അപേക്ഷ മാനിച്ച് കുട്ടികളുടെ മുഖം മാസ്ക് ചെയ്തിരുന്നു. ഇതാണ് ഞാന്‍ ധരിച്ച് വച്ചിരിക്കുന്ന മാന്യത.‍ എന്തുകൊണ്ട് ഇങ്ങനെയൊരു മാധ്യമ സംസ്കാരം ഇവിടെ വളര്‍ത്തിക്കൂടാ? ജീര്‍ണിച്ച പാപ്പരാസി സംസ്കാരം അവസാനിപ്പിച്ച്, മനുഷ്യന്റെ സ്വകാര്യതക്ക് അല്‍പ്പമെങ്കിലും വില കല്‍പ്പിക്കുന്ന, നിങ്ങളുടെ ഫോട്ടൊയെടുക്കുന്നതില്‍ വിരോധമുണ്ടൊയെന്ന് ചോദിക്കുന്ന മാന്യനായ ഒരു പത്രക്കാരനെ ഞാന്‍ എവിടെത്തേടും? എവിടെത്തേടാന്‍? മൊബൈല്‍ ഫോണ്‍ കേമറയുമായി ബസ്റ്റോപ്പില്‍ സ്തനഭംഗിയന്വേഷിക്കുന്ന(കണ്ണാടി, ഏഷ്യാനെറ്റ്) യുവത്വമുള്ളപ്പോള്‍ ഞാന്‍ നിന്നെയെവിടെത്തേടാന്‍...

ഒരു പക്ഷെ ഇതെല്ലാം എന്റെ മിഥ്യാബോധങ്ങളാണെങ്കില്‍???

പൊറ്റെക്കാടിന്റെ വരികളെ കടമെടുക്കട്ടെ, ‘അതിരാണിപ്പാടത്തെ പഴയ തലമുറയുടെ കാവല്‍ക്കാരാ, അതിക്രമിച്ച് കടന്നതിന് ക്ഷമിയ്ക്കൂ........പരദേശിയാണു ഞാന്‍’.

വാ‍ലറ്റം: അഫ്ഗാനിസ്താനില്‍ ബ്രിട്ടിഷ് പട്ടാളക്കാരന്‍ റേപ്പ് ചെയ്യുന്ന പതിനഞ്ചുകാരിയെയൊ, അല്‍ഖായിദക്കാര്‍ തലയറുക്കുന്ന അമേരിക്കക്കാര്‍ന്റെയോ, പ്രണയത്തിന്റെയും കാമത്തിന്റെയും അതിര്‍വരമ്പുകള്‍ കണ്ടുപോയ ഇറാനിപ്പെണ്‍കുട്ടിയെ കല്ലെറിഞ്ഞ് കൊല്ലുന്നതോ റ്റിവിയില്‍ കാണാതെ ഉച്ചക്ക് ഊണ് കഴിക്കില്ലെന്ന് ശാഠ്യം പിടിയ്ക്കുമോ ഭാവിയില്‍ പ്രിയ തനയന്‍???

‘ദേ...ഒരു കീറുവച്ചു തരും ഞാന്‍, കഴിക്കെടാ‍.......’

2007-07-12T08:00:00.000+05:30

ഇത് NDTV വാര്‍ത്ത കണ്ടപ്പോള്‍ തോന്നിയത്:

ഭാരതത്തില്‍ സാധാരണക്കാരന് ചികിത്സ അപ്രാപ്യമാവുന്നുവോ?. ഇത് വേദനയുണ്ടാക്കുന്ന ഒരു സത്യമാണ്, എന്താണെന്നു ചോദിച്ചാല്‍ അമേരിക്കയിലെയും ബ്രിട്ടനിലെയും പൌരന്മാര്‍ ആരോഗ്യമന്ത്രാലയം വഴിയോ ഇന്‍ഷുറന്‍സ് കമ്പനീകള്‍ വഴിയോ ചികിത്സക്ക് ഇന്ത്യയിലേക്ക് കയറ്റിയയക്കപ്പെടുമ്പോള്‍ ദാരിദ്ര്യരേഖയ്ക്കു താഴേയുള്ള ശരാശരി ഭാരതീയന്‍ ചികിത്സ കിട്ടാതെ ആശുപത്രി മതിലുകള്‍ക്ക് പുറത്ത് മരിച്ചു വീഴുന്നു.
ഇതു വായിക്കുന്നവരില്‍ ഒരാള്‍ പോലും ഗവര്‍മ്മെന്റ് ആശുപത്രികളില്‍ ചികിത്സിക്കപ്പെടാന്‍ പോയിക്കാണില്ല; നാം മലയാളികള്‍ ലോകത്തിന് തന്നെ അത്ഭുതമാണ്,മറ്റു സംസ്ഥാനങ്ങളെയപേക്ഷിച്ച് ശരാശരി മലയാളിയുടെ ആരോഗ്യം വളരെ മെച്ചപ്പെട്ടതാണ്. ഈ 3 കോടി വരൂന്ന ജനത്തെ ഗവര്‍മ്മെന്റെങ്ങിനെ സേവിക്കുന്നു? തെറ്റി, സ്വകാര്യമേഖല യാണ് നമ്മളെ സേവിക്കുന്നത്. കൃസ്ത്യന്‍ മിഷണറിമാര്‍ ചെയ്ത / ചെയ്യുന്ന സേവനം അവിടെയാണ് നാം മനസ്സിലാക്കേണ്ടത്.
എന്താണ് നമ്മുടെ പാളിച്ചകള്‍?
1950ല്‍ 120 ലക്ഷം ജനങ്ങളുണ്ടായിരുന്ന കേരളത്തില്‍ ഇന്ന് അതിന്റെ ഇരട്ടിയിലേറെ ജനങ്ങളുണ്ട്. 1950 ല്‍ പാവപ്പെട്ടവന് ലഭിച്ച ആരോഗ്യപാലനം 2001 ആയപ്പോഴേക്കും സ്വകാര്യ മേഖലയുടെ കടന്നുകയറ്റത്തോടെ പാടെ തകര്‍ന്നു കഴിഞ്ഞു. 50 വര്‍ഷം മുന്‍പ് 120 ലക്ഷം പേരെ ചികിത്സിക്കാനവശ്യമായ ആളും അര്‍ത്ഥവും തന്നെയേ ഗവര്‍മ്മേന്റ് 3 കോടിയെ ചികിത്സിക്കാനും മുതല്‍ കരുതുന്നത്. പ്രഥമശുശ്രൂഷാ രംഗത്തും ഉന്നത ചികിത്സകള്‍ ലഭിക്കാനും വേണ്ടിയുള്ള മെഡിക്കല്‍ കോളേജുകളിലും ചികിത്സ കിട്ടാന്‍ വേണ്ടിയുള്ള പാവങ്ങളുടെ കാത്തിരിപ്പ് കാണുമ്പോള്‍ മനസ്സിലാകും നമ്മുടെ പൊങ്ങച്ചക്കുമിളകളുടെ നിസ്സാരത. സ്വന്തമായി ആശുപത്രികളും, വലിയ വലിയ ആശുപത്രികളില്‍ ഡയറക്റ്റര്‍മാരായ മക്കളും മരുമക്കളുമുള്ളപ്പോള്‍ 50 രൂപാ ദിവസക്കൂലിക്കാരന്റെ കാര്യം കമ്യൂണിസ്റ്റ് മന്ത്രിമാര്‍ പോലും മറന്ന് പോകുന്നത് തീര്‍ത്തും സ്വാഭാവികം.
1. പ്രാഥമിക ചികിത്സാ സൌകര്യങ്ങള്‍ കുറവ്.
2.ജനങ്ങളിലെ വിശ്വാസമില്ലായ്മ.
3.വിദഗ്ധ ഡോക്ടര്‍മാരുടെ അപര്യാപ്തത.
4.ഡോക്ടര്‍മാരുടെയും സഹജീവനക്കാരുടെയും രോഗികളോടുള്ള പുച്ഛമനോഭാവം.
5.അത്യന്താപേക്ഷമായ മെഡിക്കല്‍ ഉപകരണങ്ങളുടെ അപര്യാപ്തത.
6.അശ്രദ്ധയോടുകൂടിയുള്ള ചികിത്സാ സമ്പ്രദായങ്ങള്‍(പഴഞ്ചന്‍).

മറിച്ച് സ്വകാര്യമേഖലയില്‍ ദിവസം 21 പ്രാവശ്യം ബിപി നോക്കുന്ന നഴ്സുമാരും കണ്ണഞ്ചിപ്പിക്കുന്ന മാര്‍ബിള്‍ തറയും, ബിലാത്തിയില്‍ പോയിപ്പഠിച്ച ഡാക്കിട്ടരും, രോഗിയെക്കണ്ടാല്‍ സല്യുട്ടടിക്കുന്ന സെക്യൂരിറ്റിയുമുള്ളപ്പോള്‍ കടം വാങ്ങിയാണെങ്കിലും ഞാന്‍ സ്വകാര്യത്തിലേയ്ക്കേ പോവുകയുള്ളൂ.

സ്വകാര്യമേഖലയെ കടിഞ്ഞാണിടാന്‍ ഗവര്‍മ്മെന്റിന് കഴിഞ്ഞാല്‍ മാത്രമേ ഈ രീതികള്‍ മെച്ചപ്പെടുത്താന്‍ സാധിക്കുകയുള്ളൂ. മെച്ചപ്പെട്ട ചികിത്സാസൌകര്യങ്ങള്‍ സാധാരണക്കാരന് എത്തിക്കാന്‍ സര്‍ക്കാരിന് എല്ലാ ബാധ്യതകളുമുണ്ട്. വിദഗ്ധ ചികിത്സ ലഭ്യമാവാന്‍ AIIMS ല്‍ ആഴ്ചകളോളം പുറത്ത് കാത്തിരിക്കേണ്ടിവരുന്ന പാവങ്ങളെക്കുറിച്ചാണ് ഈ റിപ്പോര്‍ട്ട്.

അംബിയുടെ പോസ്റ്റില്‍ ഇട്ട കമന്റ്.

2007-07-12T07:11:00.000+05:30

വളരെ നന്നായി പറഞ്ഞിരിക്കുന്നു, കേരളത്തിലെ പൊതുജനാരോഗ്യത്തിന്റ്റെ കാര്യം. അംബിയുടെ പോസ്റ്റ് ഇവിടെ.ഇതു മുഴുവന്‍ എഴുതിവെച്ചപ്പോള്‍ തോന്നി, കാണിച്ചത് തോന്ന്യാസമായെന്ന്. ഇത്രേം വലിയൊരു കമന്റ് വേണ്ടായിരുന്നു.
തത് വിഷയത്തില്‍ ഞാന്‍ തോന്ന്യസിച്ചത്.....
വളരെ നന്നായി. വളരെയധികം ചര്‍ച്ച ചെയ്യപ്പെട്ട, ഇനിയും ചര്‍ച്ച ചെയ്യേണ്ട വിഷയമാണ്. എങ്ങിനെ ഈ വിഷയങ്ങള്‍ ജനങ്ങളിലേത്തിക്കും, ജനപ്രതിനിധികളിലെത്തിക്കും?ഗവര്‍മ്മെന്റിലെത്തിക്കും? സംഘടനാശക്തി ഒന്നുകോണ്ടു തന്നെ...അംബി പറഞ്ഞതുപോലെ പേ റിവിഷിന്‍ മാത്രം സംഘടനാ അജണ്ടയില്‍ ഒതുക്കുന്ന സംഘടനകള്‍ ഉള്ളപ്പോള്‍, അതു സാധ്യമല്ലാതാകുന്നു. പിന്നെയുള്ളൊരു വഴി വിദ്യാഭ്യാസം ആകുന്നു. ബോധവല്‍ക്കരണം, ജനങ്ങളിലേക്ക് എത്രയും വേഗം എത്തിക്കുക.അംബിയെപ്പൊലെയുള്ളവരുടെ ലേഖനങ്ങള്‍ പത്രമാധ്യമങ്ങളില്‍ വരണം, allied medical profession എന്താണെന്നു ജനങ്ങള്‍ മനസ്സിലാക്കണം. ഒരു ഗവര്‍ണ്ണറെ മെഡിക്കല്‍ കോളെജില്‍ കൊണ്ടുപോയി കൊന്നവരാണു നമ്മള്‍, എന്നാലും പഠിക്കുകയില്ല.എവിടെയാണു നമ്മള്‍ക്ക് തെറ്റ് പറ്റിയത്?ഒരളവു വരെ സമാന്തര ഗവര്‍മ്മെന്റ് ആശുപത്രികള്‍ നടത്തുന്ന ക്രിസ്തീയ സ്ഥാപനങ്ങളെ പഴി പറയേണ്ടീ വരും.അവര്‍ നടത്തുന്ന ജനസേവനങ്ങള്‍ കണ്ടെന്നു വക്കുന്നില്ല, എങ്കിലും ‘കോടിമാതാ യൂണീവേഴ്സിറ്റി’ കള്‍ സായിപ്പിന് പരിചയപ്പെടുത്തിക്കൊടുക്കാന്‍ ഇവര്‍ ചെയ്ത പങ്ക് ചെറുതല്ല.ആവശ്യം സൃഷ്ടിയുടെ മാതാവാണെന്നതാണ് സത്യം. കേരളത്തിലെ 5 മെഡിക്കല്‍ കോളെജുകളില്‍ നിന്നു കൂടി പുറത്തിറങ്ങുന്ന 150 allied medical profesionals നെക്കൊണ്ടു 3കോടി വരുന്ന കേരളത്തെ പരിചരിക്കുക എന്ന യാഥാര്‍ത്ഥ്യം സാധ്യമാകാത്തതുകൊണ്ട് കത്തനാരന്മാരുടെ ആശുപത്രികള്‍ നടത്തുന്ന 6 മാസത്തെയും, 1 വര്‍ഷത്തെയും ഡിപ്ലോമ പഠിച്ചിറങ്ങുന്നവരെ ഉപയോഗിച്ച് പൊതുജനാരോഗ്യം വളരെ ഭംഗിയായി നടത്തുകയാണ് സര്‍ക്കാര്‍. ഇവിടെയാണ് സര്‍ക്കാരിന്റെ ഇരട്ടത്താപ്പു നയം. ഇവിടെ നിന്ന് പഠിച്ചിറങ്ങുന്നവര്‍ക്ക് യോഗ്യത പോരെന്ന് പറഞ്ഞ് അവര്‍ക്ക് അംഗീകാരം കൊടുക്കാതിരിക്കുക, എന്നാല്‍ അംഗീകാരമില്ലാത്തവരെ കൊണ്ടു തന്നെ പൊതുജനാരോഗ്യ പരിപാലനം ഭംഗിയായി നടത്തുക. ഇവരുടെ അംഗീകാരം റദ്ദ് ചെയ്താല്‍ പിന്നെ കേരളം കട്ടപ്പൊഹ...അതുകൊണ്ടുതന്നെ കേരളത്തിലെ സ്വകാര്യ ആശുപത്രികള്‍ക്ക് ഒന്നുകൊണ്ടും പേടിക്കാനില്ല, 6 മാസക്കാരനെ ഗവര്‍മ്മെന്റ് ഒരിക്കലും പുറത്താക്കാനും പോവുന്നുമില്ല, 4 വര്‍ഷം പഠിച്ചവനെയൊട്ട് എടുക്കാനും പോവുന്നുമില്ല(യെവനൊക്കെ എങ്ങിനെ കാശുകൊടുക്കാനാ). അതുകൊണ്ടാണ് നേരത്തെ പറഞ്ഞ കൃസ്തീയ സഭകളുടെ ‘സേവനം’ ഞാന്‍ സൂചിപ്പിച്ചത്.വെല്ലൂരില്‍ CMC നടത്തുന്ന കോഴ്സുകളില്‍ പഠിച്ചിറങ്ങുന്നവര്‍ക്ക് പ്രവര്‍ത്തിപരിചയത്തില്‍ ആഗോള പ്രാവീണ്യമുണ്ട്. എന്നാല്‍ അവരുടെ കരിക്കുലത്തില്‍ കാല‍ത്തിനനുസരിച്ച മാറ്റം വരുത്തിയിട്ടില്ല. ഇതേ സ്ഥാപനത്തിന്റെ ശാഖകള്‍ കേരളത്തില്‍ പലേ ഭാ‍ഗത്തുമുണ്ട്. ഇവിടെ നിന്നിറങ്ങുന്നവര്‍ക്ക് മാതൃസ്ഥാപനത്തില്‍ നിന്നിറങ്ങുന്നവരുടെയത്രയും യോഗ്യതയും അവകാശപ്പെടാന്‍ കഴിയില്ല.ഇതിനൊരു മാറ്റം വരുത്താന്‍ കഴിയില്ലെ? കഴിയും, കവി പാടിയില്ലെ? മാറ്റുവിന്‍ ചട്ടങ്ങളെ...2 വര്‍ഷം മുന്‍പ്, അംബി പറഞ്ഞ പോലെ അലഹാബാദ് യൂണിവേഴ്സിറ്റി കൂണുകള്‍ പോലെ കോഴ്സുകള്‍ തുടങ്ങിയപ്പോള്‍ കേന്ദ്രമന്ത്രാലയത്തിനൊരു കത്തയച്ചിരുന്നു ഞാന്‍, വിശദമായി കോഴ്സിന്റെ പോരായ്മകള്‍ വിവരിച്ചുകൊണ്ട്. അതു കൈപ്പറ്റിയതിനു രശീതിയോ, മറുപടിയൊ ഉണ്ടായില്ല, എന്നാല്‍ മറ്റാരോ നല്‍കിയ പരാതിയുടെ പേരില്‍ ഹൈക്കോടതി ആകോഴ്സുകള്‍ റദ്ദ് ചെയ്യുകയോ, തുടര്‍ന്ന് നടത്തുന്നത് നിര്‍ത്തലാക്കുകയും ചെയ്യുകയുണ്ടായി. എന്നിരിക്കിലും ആ സെര്‍ട്ടിഫിക്കെറ്റ് ഉപയോഗിച്ച് വിദേശത്ത് ജോലി നേടിയ ആളുകളെ എനിക്കറിയാം.ഇതൊന്നുമല്ല പ്രശ്നം, ഇങ്ങിനെയുള്ള പല ജാതികളെയെങ്ങിനെ ജ്നാനസ്നാനം ചെയ്യിക്കും എന്നതാണ്. താന്‍പോരിമ പറഞ്ഞുനടക്കുന്ന 2 വര്‍ഷത്തെ ഗവര്‍മ്മെന്റ് ഡിപ്ലൊമാ വിദ്യാര്‍ത്ഥികള്‍ ജാഡയുപേക്ഷിച്ച് അവരുടെ കോഴ്സ് മൂന്നു വര്‍ഷമാക്കണമെന്ന സമരവുമായി നടക്കുകയാണിപ്പോള്‍. പത്തു പതിനഞ്ചു വര്‍ഷം മുന്‍പ് ഇന്ത്യയിലാദ്യമായി 4 വര്‍ഷത്തെ ബിരുദം ആരംഭിച്ചപ്പോള്‍ അതിനെതിരെ കേരളത്തില്‍ മെഡിക്കല്‍ കോളെജില്‍ കൊടി നാട്ടി സമരം നടത്തിയവരുടെ പിന്മുറക്കാര്‍ അവരെ ആ കോഴ്സില്‍ പഠിപ്പിക്കണമെന്ന് പറഞ്ഞാണിപ്പോള്‍ സമരം. വിരോധാഭാസം എന്നല്ലാതെയെന്തു പറയാന്‍. ഈ പ്രശ്നങ്ങള്‍ ഇതിനു മുന്‍പ് യു.കെയിലും, യുഎസിലും ഉണ്ടയിട്ടുണ്ട്. അവരെല്ലാം ഭംഗിയായി പ്രശ്നം പരിഹരിച്ചിട്ടുണ്ട്. രാജ്യത്ത് നിലനില്‍ക്കുന്ന കോഴ്സുകളെല്ലാം ഏകീകരിച്ച് പരീക്ഷ നടത്തി ഒരു ജനറല്‍ കൌണ്‍സില്‍, പിന്നെ അംബി പറഞ്ഞ പോലെയുള്ള നിര്‍ദ്ദേശങ്ങള്‍ എന്നിവ പ്രാവര്‍ത്തികമാക്കാ‍ന്‍ ഗോസായിമാരുടെ ഒരു സംഘം കുറെ നാളായി കേന്ദ്രമന്ത്രാലയത്തില്‍ പണിയുന്നു. അവര്‍ ഒരു സംഘടനയുണ്ടാക്കി. എന്നാല്‍ അവരില്‍ ചിലരോട് അസൂയയുള്ള മറ്റുചിലര്‍ ചേര്‍ന്ന് മറ്റോരു സംഘടനയുണ്ടാക്കി. ഇപ്പോള്‍ ഒന്നും നടക്കുന്നില്ല. ഗവര്‍മ്മെന്റ് മുന്‍‌കൈയെടുത്ത് ഒരു കൌണ്‍സില്‍, അതില്ലെങ്കില്‍, കത്തനാരന്മാരും, ബാക്കിയുള്ള ആരമ്മാരും കൂടി എല്ലാം കൂടിക്കൂട്ടിക്കുഴച്ച് അവരുടെ കോഴ്സുകള്‍ക്ക് മാത്രമായി ഒരു ജനറല്‍ കൌണ്‍സില്‍ ഉണ്ടാക്കി, തോന്നിയ പോലെ കാര്യങ്ങള്‍ നടത്തും.പ്രത്യക്ഷമായ ഒരു കുഴപ്പവും സംഭവിക്കാത്ത കാലത്തോളം ഈ പ്രശ്നങ്ങള്‍ ഗവര്‍മ്മെന്റിന്റെ ശ്രദ്ധയില്‍പ്പെടുകയില്ല, അല്ലെങ്കില്‍ ശ്രദ്ധിക്കുകയില്ല.50 കൊല്ലം മുമ്പ് സായിപ്പുണ്ടാക്കി വെച്ച ആരോഗ്യരംഗം അതേ പോലെ പരിപാലിച്ചുകൊണ്ടിരിക്കുന്ന ഗവറ്മ്മെന്റ് അവര്‍ ഇതേ രംഗത്ത് എത്തിച്ചെര്‍ന്ന പുതിയ മാനങ്ങള്‍ കണ്ടീലെന്ന് നടിക്കുകയാണ്. ഇതു പോലുള്ള ലേഖനങ്ങള്‍ പത്രമാധ്യമങ്ങളില്‍ സ്ഥിരമായി വരണം. ജനങ്ങള്‍ ബോധവാന്മാരാവണം. അംബിയെപ്പോലുള്ളവര്‍ ഇനിയും ഇതെക്കുറിച്ചെഴുതണം. വളരെ നന്നായിരിക്കുന്നു.